Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնությամբ` ս.թ. մարտի 6-12-ը, ԵՀԽ Կլոր սեղան Միջեկեղեցական բարեգործական կազմակերպության ներկայացուցիչները` Մայր Աթոռի Միջեկեղեցական հարաբերությունների բաժնի տնօրեն Տ. Հովակիմ եպիսկոպոս Մանուկյանը (Հոգաբարձուների խորհրդի անդամ), դոկտոր Կարեն Նազարյանը (գործադիր տնօրեն) և Ռուբինա Դևրիկյանը (ծրագրերի պատասխանատու) աշխատանքային այցով եղան Բրյուսելում:
Այցի նպատակն էր ծանոթանալ Բրյուսելում եկեղեցական և Եվրոպական կազմակերպությունների գործունեությանը, Հայաստանի հետ նրանց ունեցած կապերին և իրականացվող ծրագրերին, Կլոր սեղան բարեգործական հիմնադրամի գործունեությունը որպես տարածաշրջանային և միջեկեղեցական կազմակերպություն ներկայացնել Եվրոպական կառույցների ներկայացուցիչներին և ուղիներ փնտրել համագործակցության հետագա զարգացման համար:
Այս նպատակով պատվիրակությունը աշխատանքային հանդիպումներ ունեցավ Եվրոպական խորհրդի Հարավային Կովկասի և «Արևելյան գործընկերության» պատասխանատուների, Եվրոպական խորհրդարանի` արտաքին քաղաքականության և հարաբերությունների ներկայացուցիչների, «Եվրադիակոնիա» կազմակերպության, Եվրոպական եկեղեցիների կոնֆերանսի, Հայաստանի Եվրոպական ընկերներ կազմակերպության և մի շարք այլ եվրոպական կազմակերպությունների հետ:
Պատվիրակության անդամներին ընդունեց նաեւ Բենիլյուքս երկրների հոգևոր հովիվ Տ. Զատիկ վարդապետ Ավետիքյանը:
Ի թիվս տարբեր պայմանավորվածությունների` համաձայնություն ձեռք բերվեց Եվրոպական եկեղեցիների կոնֆերանսի «Եկեղեցի և հասարակություն» հանձնախմբի հետ` համագործակցել «Սոցիալական հայեցակարգի» ստեղծման աշխատանքների և տարածաշրջանային երկխոսությունը խթանող ծրագրերի բնագավառներում:
