«Սերժ Սարգսյանը փորձում է միջազգային հանրությանը հավելյալ հույս ներշնչել, որ խնդրի կարգավորումը այն հիմքով, ինչ բանակցում են, հնարավոր է: Բայց իմ կարծիքով, դա հնարավոր չէ, և եթե չլիներ բանակցությունների միլիտարիզացիան, երբ բանակցությունները, բառիս բուն իմաստով, ուղեկցվում են սադրանքներով ու զինվորների սպանություններով, ապա միգուցե հասկանալի լիներ: Բայց հիմա վտանգավոր դրություն է ստեղծվել»,- Սերժ Սարգսյանի` Ռիգայում արած հայտարարությունն այսպես մեկնաբանեց ԱԺ «Ժառանգություն» խմբակցության ղեկավար Ստեփան Սաֆարյանը:
Հիշեցնենք, որ Ս.Սարգսյանը հայտարարել էր, թե ԼՂ խնդրում Բաքվի դիրքորոշման մեջ որոշակի առաջընթաց կա, և մոտ ապագայում հնարավոր կլինի որոշակի համաձայնության հասնել ԼՂ խնդրի կարգավորման սկզբունքների շուրջ:
Սաֆարյանի խոսքերով, բանակցություններից առաջ կամ հետո ադրբեջանցիների կողմից հայ զինվորների պարբերաբար սպանությունից հետո Սերժ Սարգսյանի այս հայտարարությունները վտանգավոր են:
«Ստացվում է, որ հայկական կողմը նորմալ է համարում դա և հույս ունի, որ նման բանակցությունների արդյունքում որևէ բան կլինի»,- ասաց Սաֆարյանը` հավելելով, որ ընդհակառակը, բանակցային գործընթացում պետք է ցնցում լինի, որպեսզի Ալիևը հասկանա` անթույլատրելի է բանակցությունների ռազմականացումը:
«Իսկ նման հայտարարությունները ընդամենը նպաստում են անուղղակի կերպով, որ Ալիևը շարունակի նույն գործելաոճը»,- ասաց Սաֆարյանը:
