ՀՀ փոխվարչապետ, տարածքային կառավարման նախարար Արմեն Գևորգյանի հետ հանդիպմանը Ագարակի քաղաքապետ Մխիթար Զաքարյանը առաջարկ-խնդրանքով դիմեց փոխվարչապետին` թույլատրելու Ագարակում ԶԱԳՍ բացել: Ա.Գևորգյանը ասաց, որ ստացել է քաղաքապետի պաշտոնական նամակը, բայց նպատակահարմար չի գտնում Ագարակում ԶԱԳՍ ունենալը:
«Նայեցի վերջին մեկ տարվա թվերը, 400 գործարք է արվել Մեղրիի ԶԱԳՍ-ում, որից Ագարակինը` 40 է: Գտնում եմ, որ ծավալները էն չի, որ առանձին բացենք, ամեն դեպքում ես պետբյուջեից էդքան փող չեմ տա»,- ասաց փոխվարչապետը:
Քաղաքապետի այն դիտարկմանը, որ գործարքների 60 տոկոսը Ագարակինն ու տարածաշրջանի գյուղերինն է` Կարճևան, Գուդեմնիս, Կուրիս, ու մարդիկ 11-15 կմ կտրում են` հասնում Մեղրի, փոխվարչապետը հակադարձեց. «Մարդիկ գյուղերից 40 կմ կտրում-հասնում են կենտրոն, որ ԶԱԳՍ-ում գործարք անեն, հլա Ագարակից Մեղրի հարթ, ասֆալտապատ ճանապարհ է»,- ապա Ա.Գևորգյանը ավելացրեց, որ եթե տեղական բյուջեն թույլ է տալիս, ապա թող բացի ԶԱԳՍ:
«Ամեն դեպքում չեմ կարծում, որ «պրիստիժի» համար արժե նման ծախսեր անել, մի ավելի լավ գործ արեք»,- հորդորեց փոխվարչապետը: