Երեկ Ճապոնիայում տեղի ունեցած երկրաշարժի հետևանքով խախտվել է Երկիր մոլորակի առանցքը` մոտավորապես 10 սանտիմետրով: Այս մասին հայտնել են Իտալիայի երկրաֆիզիկայի և հրաբխագիտության ինստիտուտի մասնագետները, հաղորդում է RBC-ն:
Իտալացի գիտնականները հաղորդել են, որ այս խախտումը, փաստորեն, ուղղել է Չիլիում 2010թ. փետրվարին տեղի ունեցած խախտումը, երբ երկրագնդի առանցքը 8 սմ խախտվել էր: Այն ժամանակ օրը կրճատվել էր 1.26 միկրովայրկյանով, հիմա այն մոտեցել է նորմային:
Ամերիկյան գիտնականները, հակառակը, նշում են, որ օրը կրկին կրճատվել է, այս անգամ 1.6 միկրովայրկյանով:
Մի բան ակնհայտ է. Ճապոնիայի հզոր երկրաշարժը հանգեցրել է երկրագնդի առանցքի զգալի խախտումների, ինչը վկայում է այդ բնական երևույթի աննախադեպ բնույթի մասին: Իսկ թե կրճատել է մեր կյանքն այդ երևույթը, թե երկարացրել` ցույց կտա ժամանակը և գիտնականների ավելի մանրամասն ուսումնասիրությունը: