Ադրբեջանական 1news.az կայքի փոխանցմամբ, ամերիկյան Stratfor վերլուծական կենտրոնի փորձագետների կարծիքով, Մերձավոր Արևելքում ընթացող գործընթացների կենտրոնը Պարսից ծոցն է.
«Հենց այստեղ է խախտվել սուննիների ու շիաների միջև դիմակայության պատմականորեն գոյություն ունեցած հավասարակշռությունը: 2003 թվականին Իրաքի նախագահ Սադամ Հուսեյնի ռեժիմի տապալումից հետո Իրանը ստացավ պատմական հնարավորություն` ամրապնդելու իր արևմտյան սահմանները և իր գաղափարախոսությունն արտահանելու դեպի արաբական աշխարհի կենտրոն:
Իրաքից ամերիկյան զորքերի դուրսբերման պլանն Իրանի համար նոր հնարավորություն է լրացնելու առաջացող վակուումը: Պաշտոնական Թեհրանը Հյուսիսային Աֆրիկայում առաջացած անկայուն իրավիճակի ժամանակ փորձում է իր նպատակներին ծառայեցնել Պարսից ծոցի երկրներում ժողովրդական զանգվածների դժգոհությունը:
Իրանի հիմնական թիրախներն են Քուվեյթը, Բահրեյնը և Սաուդյան Արաբիան, ուր առկա է մեծաթիվ շիական բնակչություն, և որտեղ կենտրոնացած են ամերիկյան զորքերը: Հենց այդ պատճառով էլ Բահրեյնում իրավիճակը շարունակում է մնալ լարված, ինչը շատ կարևոր է, քանի որ Բահրեյնը հանդիսանում է ողջ տարածաշրջանի բանալին:
Եթե Իրանին հաջողվի լրջորեն ապակայունացնել իրավիճակը տվյալ երկրում, ապա դա կարող է դոմինոյի էֆեկտ ունենալ: Իսկ դա կհամընկնի տարածաշրջանից ամերիկյան զորքերի մեծ մասի դուրսբերմանը, ինչը մեծապես կվնասի սուննի արաբական երկրներին»:
Հիշեցնենք, որ WikiLeaks-յան բացահայտումներում նշված էր այն մասին, որ Սաուդյան Արաբիան և այլ արաբական երկրներ ԱՄՆ-ից բազմիցս պահանջել են ի վերջո հարձակվել Իրանի վրա: 2008 թվականի ապրիլին սաուդյան թագավոր Աբդուլլան Վաշինգտոնին կոչ էր արել «կտրել օձի գլուխը»: