Սոտք գյուղի վարչական տարածքում արդեն մի քանի օր է, ինչ GeoProMining Gold ընկերությունը սկսել է Սոտքի հանքավայրի ոսկու հանքանյութի մանրացման համար ջարդող և մանրացնող սարքի տեղադրման աշխատանքները: Այս մասին ասվում է «ԷկոԼուր» կազմակերպության տարածած հաղորդագրությունում:
«Ինչպես պարզվեց, ջարդող և մանրացնող սարքի տեղադրման նախագիծը չի ներկայացվել ՀՀ բնապահպանության նախարարության բնապահպանական փորձաքննությանը: «ԷկոԼուր»-ի հարցին, թե ինչո՞ւ նախագիծը չի ներկայացվել ՀՀ բնապահպանության նախարարության բնապահպանական փորձաքննության դիտարկմանը, ընկերության ներկայացուցիչ Արմեն Մելքոնյանը պատասխանեց, թե չի կարծում, որ ջարդող և մանրացնող սարքի համար ինչ-որ թույլտվություն է անհրաժեշտ:
Նշենք, որ հանքանյութի մանրացումը վերամշակման գործընթացի նախնական փուլն է, որը Սևանի ավազանում արգելվում է «Սևանա լճի մասին» ՀՀ օրենքի 10-րդ հոդվածով:
Հաշվի առնելով այն, որ ամեն ամիս ընկերությունն արդյունահանում է թունավորության առաջին դասի տարրեր պարունակող 60-70 հազար տոննա հանքանյութ, ինչպես նաև հանքանյութը պարունակում է ռադիոակտիվ տարրեր, օրինակ` թորիում, կարելի է անմիջապես ասել, որ Սոտքի բնակիչների անհանգստությունն ունի բոլոր հիմքերը, քանի որ մանրացման արդյունքում առաջացող փոշին անմիջապես կնստի նրանց տարածքների վրա, Սոտք գետի վրա, տեղումների հետ կներթափանցի ստորգետնյա ջրերի մեջ, իսկ այնուհետև` Սևանա լիճ:
Զարմանալի է միայն այն, որ ՀՀ բնապահպանության նախարարությունը, «Սևան» ազգային պարկը, բնապահպանական պետական տեսչությունն անհանգստության ոչ մի հիմք չեն տեսնում»,- նշված է հաղորդագրության մեջ:
