Ադրբեջանական salamnews.org լրատվական կայքի փոխանցմամբ, Ադրբեջանն այս տարի արդեն Վրաստանին հատկացրել է 224 միլիոն խմ բնական գազ, որից հունվարյան մասնաբաժինը կազմել է 76,49 մլն խմ, իսկ փետրվարյանը` 147.53 մլն խմ:
Նշվում է, որ 2010 թվականին Ադրբեջանը Վրաստանին մատակարարել է ընդհանուր առմամբ 339.16 մլն խմ:
Հիշեցնենք, որ էներգետիկ ոլորտում Վրաստանն Ադրբեջանի համար, բացի սպառման շուկա լինելուց, շատ կարևոր է նաև տարանցման տեսանկյունից` սեփական էներգակիրները Վրաստանի տարածքով դեպի Եվրոպա փոխադրելու համար: Ադրբեջանը շահագրգռված է իր հեղուկ գազը Եվրոպա առաքել Վրաստանի տարածքով, քանի որ դա չի պահանջում տարանցիկ ծախսեր, ինչպես, ասենք, թուրքական տարածքով փոխադրելու պարագայում է:
Այդ առումով Ադրբեջանի ուշադրության կենտրոնում է հայտնվել Փոթիից հյուսիս ընկած Կուլևիի տերմինալը, որի սեփականատերը Ադրբեջանի Հանրապետության պետական նավթային ընկերությունն է: Այնտեղ համապատասխան գազային տերմինալի կառուցման պարագայում ադրբեջանական գազը կհեղուկացվի և հատուկ լցանավերով կուղղվի դեպի Եվրոպա: