Քիչ առաջ Ճապոնիայում գրանցվել է հերթական հզոր երկրաշարժը, որը, ըստ մասնագետների, երեկվա 8.9 մագնիտուդ հզորություն ունեցող երկրաշարժի հետցնցումն է: Ըստ մասնագետների` ուժեղ ցնցումները Ճապոնիայում կշարունակվեն դեռ մեկ ամիս: Այսօր գրանցված երկրաշարժը նույնպես Հոնսյու կղզու մերձակայքում է:
Ճապոնիայում տեղի ունեցած երկրաշարժի հետևանքով զոհերի թիվը հասել է 705-ի: Սա զոհերի հաստատված թիվն է, ավելի քան 1400 մարդ համարվում են անհայտ կորած: Թե զոհերի և թե անհայտ կորածների թիվը աճելու միտում ունի, քանի որ աղետի տարածքը հսկայական է: Այս մասին հաղորդում է ճապոնական NHK հեռուստաալիքը:
Չի հաջողվում նաև հաշվել երկրաշարժի հասցրած նյութական վնասը: Ակնհայտ է, որ այն կհասնի մի քանի տասնյակ միլիարդ դոլարի, ինչն, ըստ մասնագետների, հսկայական թիվ է նույնիսկ աշխարհում երրորդ տնտեսությունն ունեցող Ճապոնիայի համար: Ամենաշատ զոհերն ու անհայտ կորածները Միյագի, Կեսենումա, Իվատե և Ֆուկուսիմա պրեֆեկտուրաներում են:
Հիշեցնենք, որ երեկ Ճապոնիայում տեղի է ունեցել երկրաշարժ, որի ուժգնությունն էպիկենտրոնում կազմել է այդ երկրի համար աննախադեպ 8.9 մագնիտուդ: Դրան հետևել է ալիքների 10 մետր բարձրությամբ ցունամին, որը մեծացրել է թե՛ ավերածությունների քանակը, թե՛ զոհերի և անհայտ կորածների թիվը:
