«Նոր ժամանակներ» կուսակցության նախագահ Արամ Կարապետյանը կարծում է, որ Լեռնային Ղարաբաղի ճանաչման գործընթացը պետք էր շուտ սկսել: Իսկ այժմ, ըստ ՆԺԿ նախագահի, այն որեւէ փոփոխության չի կարող բերել: Արամ Կարապետյանը կարծում է, որ քաղաքական կոնյունկտուրան այսօր այնպիսին է, որ կարող է հանգեցնել ապակայունացման: Նա նորմալ է վերաբերվում «Ժառանգություն» կուսակցության առաջարկությանը, քանի որ այդ կուսակցությունն ընդդիմություն է: Եթե Աստանայում Հայաստանի համար լինեն ոչ բարենպաստ զարգացումներ, իսկ ԼՂ ճանաչման գործընթացը մնա օրակարգում, ապա, ըստ Արամ Կարապետյանի, դա կնշանակի շանտաժ անել միջազգային հանրությանը, հանգեցնել պատերազմական իրավիճակի: Արամ Կարապետյանն այն կարծիքին է, որ միջազգային հանրությունը նպատակ ունի նախ լուծել ԼՂ հարցը, հետո` բացել հայ-թուրքական սահմանը: Իսկ միջազգային հանրությունը, ըստ ՆԺԿ ղեկավարի, ԼՂ հարցն ուզում է լուծել «Հողեր`ժամանակավոր կարգավիճակի դիմաց» սկզբունքով: Սրանից զատ, նա կարծում է, որ միջազգային հանրությունը, տեսնելով, որ այլեւս ստատուս-քվոն ձեռնտու չէ, կարող է դիմել հարցի լուծման Դեյթոնյան տարբերակին` պարտադրված խաղաղությանը: Առաջիկայում, ըստ ՆԺԿ ղեկավարի, «ճանապարհային քարտեզ» չի ստորագրվի, որը կարող է հստակություն մտցնել ԼՂ կարգավորման հարցում: Նրա կանխատեսմամբ` Սերժ Սարգսյանը որեւէ փաստաթուղթ չի ստորագրի:
