Անդրադառնալով նախագահների եռակողմ հանդիպումից հետո հայ և ադրբեջանական կողմի այն հայտարարությանը, թե երկու կողմերի վերաբերմունքը դրականորեն փոխվել է, թեև շփման գծում հայկական կողմը հերթական զոհն է տալիս, ԲՀԿ ԱԺ պատգամավոր Նաիրա Զոհրաբյանը նկատեց, որ, այդուհանդերձ, եթե բանակցությունները շարունակվում են, սա արդեն պետք է դրական գնահատել, որովհետև բանակցությունների, երկխոսության խզումը ավելի բացասական հետևանքների կարող է հանգեցնել։
«Բայց որ ժամանակն է, որ համանախագահող և միջնորդ երկրները ավելի հասցեական լինեն իրենց դիրքորշումներում և հստակ արձագանքեն Ադրբեջանի ռազմատենչ հայտարարություններին, ոչ կառուցողական դիրքորշմանը բանակցային ամբողջ գործընթացում՝ դա իսկապես այս պահին, իմ գնահատմամբ, արդեն հրամայական է։
Ես, իհարկե, գնահատում եմ Սոչիում ստորագրված եռակողմ հայտարարությունը, բայց ես բացարձակապես վստահություն չունեմ, որ Ադրբեջանի նախագահը կհարգի իր ստորագրությունը, և այդ վստահություն չունենալը հիմնված է փաստերի վրա։ Սա արդեն հրամայական է, այլապես Ալիևը կարող է ցանկացած հայտարարություն ստորագրել և հաջորդ իսկ պահին խախտել ցանկացած հայտարարություն, ինչը արդեն ավանդույթ է դառնում այդ երկրի քաղաքական էլիտայի համար։ Սանկտ Պետերբուրգից հետո հրահրել Չայլուն, Սոչիից առաջ Չայլուի մոտակայքում կրկին դեպքեր հրահրել, այսօր ևս։
Այսինքն, եթե միջնորդ երկրները կոնկրետ հարցադրումներ չանեն Ադրբեջանի քաղաքական էլիտայի առաջ, այս դեպքերը լինելու են շարունակական»,- ավելացրեց Նաիրա Զոհրաբյանը։