Մարտի 10-ից Վանաձորի` Շառլ Ազնավուրի անվան մշակույթի պալատում մեկնարկեց բրիտանական ֆիլմերի 9-րդ փառատոնը:
Փառատոնի շրջանակներում ներկայացվում են բրիտանական ժամանակակից կինոարվեստի լավագույն աշխատանքները: Ընտրված ֆիլմերի ժանրերը տարբեր են` սկսած Մեծ Բրիտանիայի պատմությունից մինչև մարդու իրավունքներ:
Շառլ Ազնավուրի անվան մշակույթի պալատում վանաձորցիները դիտեցին ներկայացվելիք երեք ֆիլմերից առաջինը՝ «Արբոր»-ը, որը բրեդֆորդցի դրամատուրգ Անդրեա Դանբարի ու նրա դուստր Լորեյնի լարված հարաբերությունների իրական ու տպավորիչ պատմությունն է:
Վանաձորցիները մշակույթի պալատում եւս երկու ֆիլմ դիտելու հնարավորություն կունենան:
Չնայած կինոդիտման համար մուտքն ազատ է բոլորի համար, իսկ փառատոնի կազմակերպչի` Հելսինկյան քաղաքացիական ասամբլեայի Վանաձորի գրասենյակի կողմից իրականացված գովազդային արշավին, կինոդիտման առաջին օրը դահլիճը կիսադատարկ էր:
Մնում է ենթադրել, որ վանաձորցիներին այնքան էլ չեն հետաքրքրում բրիտանական ֆիլմերը:
