Ճապոնիայում առնվազն ութ մարդ է զոհվել այսօր տեղի ունեցած երկրաշարժի և նրան հաջորդած ցունամիի ժամանակ: Այս մասին հաղորդում է Reuters գործակալությունը:
Ճապոնիայի կառավարության գլխավոր քարտուղար Յուկիո Էդանոն հայտարարել է, որ սա ամենահզոր երկրաշարժն էր Ճապոնիայի պատմության մեջ: Նա հայտնել է, որ վնասը հսկայական է, և ճապոնացիները պատրաստ են ընդունել օտարեկրյա պետությունների օգնությունը:
8.9 մագնիտուդ երկրաշարժին հաջորդել են մի քանի հզոր երկրաշարժեր, որոնց ուժգնությունը եղել է 7.0 մագնիտուդից ավելի: Ճապոնիայից ստացվող տեղեկություններից և տեսանյութերից կարելի է ենթադրել, որ զոհերի թիվն անհամեմատ մեծ կարող է լինել:
7.0 մագնիտուդով երկրաշարժերը Ճապոնիայում չեն դադարի մեկ ամիս շարունակ: Այսպիսի կանխատեսում են անում մասնագետները` հաշվվի առնելով այսօր կեսօրին տեղի ունեցած երկրաշարժի հզորությունը:
Երկրաշարժի գոտում նկատվում են հրդեհների մեծ օջախներ: Տոկիոյում 4 մլն բնակարան մնացել է առանց էլեկտրաէներգիայի: Տոկիոյի մերձակայքում գտնվող նավթավերամշակման գործարանում սկսվել է հրդեհ: Այրվում են ողջ գործարանն ու պահեստները: Այս պահին Ճապոնիայի գրեթե ողջ տարածքում խախտվել է տրանսպորտային կապը:
Քիչ առաջ հեռուստատեսությամբ ելույթ է ունեցել Ճապոնիայի վարչապետ Նաոտո Կանը, որը գլխավորում է երկրաշարժի հետևանքները վերացնող շտաբը: Նա բնակչությանը կոչ է արել հանգստություն պահպանել և հեռուստատեսությամբ ու ռադիոյով լսել և հետևել կառավարության ցուցումներին:
Ցունամիի վտանգի տարածքում են հայտնվել մի քանի տասնյակ երկրներ, այդ թվում՝ Ռուսաստանը, Մեքսիկան, Թայվանը, Ինդոնեզիան, Ավստրալիան, Հարավային Ամերիկայի արևմտյան ողջ առափնյա շրջանները:
Հայտնի է, որ ամբողջությամբ ավերվել է Սենդայ ծովափնյա քաղաքը, որտեղ ալիքների բարձրությունը հասել է 10 մետրի:
Տեղեկությունները՝ ըստ Kyodo, Reuters, Associated Press, Ria-Novosti գործակալությունների: