Թուրքական Radikal թերթի հաղորդմամբ, այս անգամ էլ վարչապետ Էրդողանն է սուր քննադատության ենթարկել Թուրքիայում քաղաքացիական ազատությունների ոտնահարման շուրջ Եվրախորհրդարանի զեկույցը:
Սերբիայի վարչապետ Միրկո Ցվետկովիչին ընդունելուց հետո կազմակերպված մամլո ասուլիսում Էրդողանը հայտարարել է. «Դա պատվիրված զեկույց է: Ոչինչ չպետք է անել, նրանք պատասխանատու են զեկույցի պատրաստման համար: Ես տեսնում եմ, որ այս զեկույցը պատրաստողները «բավական հեռու» են Թուրքիայից, «ընդհանրապես տեղյակ» չեն նրանից, ինչն էլ վկայում է այն մասին, որ զեկույցը «պատվիրված» է եղել»:
Հիշեցնենք, որ Եվրախորհրդարանի զեկույցը հրապարակվեց մարտի 9-ին: Դրանում նշված էր, որ Թուրքիայում լրջորեն ոտնահարվում է խոսքի ազատությունը, թերացումներ կան դատական համակարգում, ոստիկանությունը բռնություններ է գործադրում «Էրգենեկոնի» և «Բալյոզի» գործերով ձերբակալված անձանց հանդեպ, չի ապահովվում կասկածյալների իրական դատական անվտանգությունը, մի շարք ինտերնետային կայքեր արգելափակվել են և այլն:
Էրդողանից առաջ էլ զեկույցը դատապարտել էին պետնախարար և ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշն ու արտգործնախարար Ահմեդ Դավութօղլուն` այն որակելով որպես «իրականությանը չհամապատասխանող ու կողմնակալ»:
