Ինչպես հաղորդում են թրքական ԶԼՄ-ները, Թուրքիայի «Երջանկություն» իսլամամետ կուսակցության` վերջերս հրաժարական տված ղեկավար Նուման Կուրտուլմուշը հայտարարել է, թե «Ժողովրդի ձայն» անունով նոր կուսակցություն է ստեղծում։ Կուրտուլմուշն ասել է, թե արդեն պատրաստվում է դիմել ներքին գործերի նախարարություն՝ քաղաքական նոր ուժի գրանցման համար։ Որոշ տեղեկությունների համաձայն՝ նոր քաղաքական կուսակցության կառավարման խորհրդի մեջ կմտնեն թրքական քաղաքական հաստատությունների ներկայացուցիչներ։ «Այս կուսակցությունը կդառնա ժողովրդի աջակիցը։ Մենք աշխատելու ենք հանուն ազատության, արդարության եւ բոլոր քաղաքացիների բարեկեցության»,-ասել է Կուրտուլմուշը։
