Թուրքական Haber Türk թերթի փոխանցմամբ՝ Թուրքիայի տարածքում գտնվող Ինջիրլիքի ամերիկյան ավիաբազայում պահվում են B-61 տիպի 70 միջուկայի ռումբեր: Չնայած այդ զինամթերքի առկայությանը՝ դրանց օգտագործման հնարավորությունները սահմանափակ են: Այդ ռումբերը, ծայրահեղ դեպքում դրանց մեծ մասը, ամերիկյան բանակի սեփականությունն են, և Վաշինգտոնը պահպանում է անհրաժեշտության դեպքում դրանք ըստ նշանակության օգտագործելու իր իրավունքը:
Աղբյուրի պնդմամբ՝ մինչև 1995 թվականը, 10-20 հատ B-61 ռումբեր գտնվել են նաև երկու այլ ավիաբազաներում՝ Աքընջըում ու Բալըքեսիրում, սակայն ներկայիս դրությամբ դրանք բոլորն էլ բերվել են Ինջիրլիք: Լուրջ հակամարտային իրավիճակի առաջացման դեպքում ամերիկյան զինվորականներն այդ ռումբերը կարող են տեղափոխել իրադարձությունների կենտրոնի մոտ:
Սակայն գլխավոր հարցն այդ զինամթերքի փոխադրումն է: Չնայած ԱՄՆ-ի բազմաթիվ համառ առաջարկներին՝ Թուրքիան չի համաձայնում Ինջիրլիքի ավիաբազայում ամերիկյան այնպիսի ինքնաթիռների կենտրոնացմանը, որոնք ունակ են կրել միջուկային ռումբեր: Թուրքիան այդ հարցում շարունակ մերժողական պատասխան է տալիս ամերիկյան իշխանություններին:
Փորձագետների կարծիքով՝ Թուրքիան ինքն օժտված է այդ միջուկային լիցքի փոխադրման հնարավորությամբ, օրինակ՝ F-16 ինքնաթիռով: Սակայն այդ ինքնաթիռը պաշտոնապես նախատեսված չէ ո՛չ այդ տիպի զինամթերքի փոխադրման, ո՛չ էլ ընդհանրապես նմանատիպ առաքելություն կատարելու համար:
Այսինքն, թուրքական կործանիչով ատոմային ռումբի փոխադրումը կապված է, այսպես կոչված, «հատուկ առաքելություն» կատարելու թույլտվություն ստանալու հետ, ինչը հարուցում է մի շարք քաղաքական խնդիրներ:
B-61-ը հանդիսանում է ԱՄՆ ռազմավարական միջուկային ուժերի հիմնական զենքը: Նրա կորպուսն ունակ է դիմակայելու գերձայնային արագությանը: B-61-ն ունի 3.58 մետր երկարություն և 33 սանտիմետր տրամագիծ: Ռումբի միջին քաշը կազմում է մոտ 320 կիլոգրամ:
Հիշեցնենք, որ 2011 թվականի դեկտեմբերի սկզբին թուրքական լրատվամիջոցները, վկայակոչելով Atomic Scientists ամսագիրը, գրեցին, որ Թուրքիայի հարավարևելյան հատվածում ընկած Ինջիրլիքի ավիաբազայում ներկայումս պահվում են 60-70 հատ B61-12 տիպի միջուկային ռումբեր:
ԱՄՆ-ը Ինջիրլիքի ռազմաբազայում չունի որևէ ինքնաթիռ, որը կկարողանա կրել դրանք, քանի որ Անկարան մերժել է ԱՄՆ-ին Ինջիրլիքում ռազմավարական ինքնաթիռներ տեղակայելու հարցում` պատճառաբանելով, որ դա կփոխի բազայի կարգավիճակը: Այդ պարագայում տվյալ ավիաբազան գործառնական տեսանկյունից ստանալով նոր հնարավորություններ` ձեռք է բերում ՆԱՏՕ-ական ավիաբազայի կարևորություն և կարգավիճակ, ուստի և հնարավոր ռազմական բախման ժամանակ դառնում է հակառակորդի թիրախ: Այդ պարագայում նաև` ռազմակայանի նկատմամբ վերահսկողությունը մասամբ անցնում է ՆԱՏՕ-ական հրամանատարությանը: Այսինքն՝ ԱՄՆ-ը այդ ատոմային ռումբերը կրելու համար պետք է օգտվի իր այլ բազաներից:
Իսկ թուրքական ինքնաթիռներն էլ նախկինում իրավունք չունեին կրել դրանք, մինչդեռ այն բանից հետո, ինչ Թուրքիան համաձայնեց իր արևելյան հատվածում ամերիկյան ռադարի տեղակայմանը, Վաշինգտոնը Թուրքիային հանձնեց 10-20 ատոմային ռումբ, որոնք այսուհետ կարող են կրել թուրքական օդուժի 142-րդ էսկադրիլիայի F-16A/B տիպի ինքնաթիռները` ԱՄՆ–ի թույլտվությամբ: 2017 թվականին Ինջիրլիքում պահվող B61-12 ռումբերը փոխարինվելու են B61-3/4 նոր մոդելի միջուկային ռումբերով
