Ռուսաստանցի գործարար Վիկտոր Բուտը, որը գտնվում է ամերիկյան բանտում և մեղադրվում է զենքի անօրինական վաճառքի և ահաբեկիչների հետ համագործակցելու մեջ, հարցազրույց է տվել ռուսական Коммерсант-ին, որին պատմել է բանտային պայմանների, իր բիզնեսի մասին: Ռուսական բոլոր լրատվամիջոցները տեղեկացրել էին, որ Բուտը պատմել է նաև Մոսկվայի նախկին քաղաքապետ Յուրի Լուժկովի հետ իր կապի մասին, սակայն ո՛չ Коммерсант-ում, ո՛չ էլ այլ լրատվամիջոցներում գեթ մեկ տող չկար այդ պնդման մասին:
Ռուս բիզնեսմեն Վիկտոր Բուտը կալանավորվել է 2008 թ. Թայլանդում Միացյալ Նահանգների պահանջով, որը նրան մեղադրում է զենքի անօրինական վաճառքի մեջ:
2010 թ. օգոստոսի 20-ին Թայլանդի Առաջին ատյանի դատարանը մերժել էր ԱՄՆ-ի միջնորդությունը՝ Բուտին հանձնել Նահանգներին: Սակայն ամերիկյան կողմը բողոքարկել էր որոշումը: Զուգահեռաբար, ամերիկյան կողմը Բուտին նոր մեղադրանքներ էր ներկայացրել` դրամաշորթություն:
Հոկտեմբերին Թայլանդի քրեական դատարանը ԱՄՆ-ին մերժեց երկրորդ անգամ: Ինքը՝ Բուտը, իրեն առաջադրված մեղադրանքները հերքում է և հայտնում, որ նախկինում ունեցել է ամբողջությամբ լեգալ բիզնես միջազգային բեռնափոխադրումների ոլորտում, որը դադարել է գործել 2001 թ. անշահութաբերության պատճառով:
Ռուսաստանը պաշտպանեց Բուտին և նրան ԱՄՆ-ին հանձնելու պահանջը համարեց անօրինական: Սակայն 2010 թ. նոյեմբերին, չնայած Ռուսաստանի ջանքերին, Բուտին հանձնեցին ԱՄՆ-ին:
Վերջերս մեկ այլ ուշագրավ տեղեկություն էլ էր հայտնվել մամուլում: Որոշ աղբյուրներ պնդում էին, որ ՌԴ պաշտպանության նախարարության նախկին սպա Անդրեյ Խլիչովին, որը Մոսկվայի պետական դատարանի կողմից դատապարվել է 18 տարվա ազատազրկման լրտեսության համար, կարող են փոխանակել ռուսաստանցի գործարար Վիկտոր Բուտի հետ: