Լոնդոնի միջազգային կինոփառատոնում գլխավոր մրցանակը ստացել է Ժակ Օդիարի «Ժանգ և ոսկոր» (De rouille et d’os) ֆիլմը, տեղեկացնում է փառատոնի պաշտոնական կայքը: Մրցանակների հանձնման արարողությունը կայացել է Լոնդոնի Ուայթհոլլ պալատում հոկտեմբերի 20-ին:
Ֆիլմը պատմում է կենդանավարժի և բռնցքամարտիկի հարաբերությունների մասին: Այս ֆիլմը մասնակցել էր նաև Կաննի փառատոնին, սակայն մրցանակներ չէր ստացել: Իսկ ինչ վերաբերում է Օդիարին, սա նրա լոնդոնյան փառատոնի երկրորդ մրցանակն է:
Բրիտանական ամենալավ դեբյուտ մրցանակին այս տարի արժանացել է Սալլի էլ-Հոսայնիի «Իմ եղբայրը սատանա է» (My Brother the Devil) ֆիլմը, ամենալավ լիամետրաժ դեբյուտ մրցանակին է արժանացել Բեն Զեյթլինի «Վայրի հարավի գազանները» (Beasts of the Southern Wild) ֆիլմը:
Ամենալավ փաստագրական ֆիլմ է ճանաչվել Ալեքս Գիբնիի «Իմ ամենամեծ մեղքը. լռությունը Աստծո տաճարում» (Mea Maxima Culpa: Silence in the House of God) ֆիլմը, որը պատմում է վատիկանյան սկանդալների մասին:
