2010 թվականին կանանց իրավունքների կենտրոն ազգային թեժ գծին եղել է 1777 զանգ, որից 701-ը` 39,4 տոկոսը, ընտանեկան բռնության վերաբերյալ է եղել, 384-ը՝ առաջնային, 317-ը՝ կրկնվող: Հատկանշական է, որ 701 զանգից 424-ը՝ 60 տոկոսը, հոգեբանական բռնության վերաբերյալ է եղել, 264-ը՝ 38 տոկոսը, ֆիզիկական և միայն 2 տոկոսը`սեռական:
Այս վիճակագրական տվյալները այսօր հրավիրված ասուլիսի ընթացքում ներկայացրեց կանանց իրավունքների կենտրոնի համակարգող Դիաննա Սարգսյանը: Նրա խոսքերով, հարկ է նկատել, որ կանանց իրավունքների կենտրոնը ընտանեկան բռնությունների հիմնախնդրով զբաղվող կազմակերպություն է, որի նպատակն է կանխարգելել ընտանիքում կանանց և երեխաների նկատմամբ կիրառվող բռնությունը, խախտել լռությունը կանանց նկատմամբ բռնության մասին և համախմբել հասարակության ուժերը ընտանեկան բռնության դեպքերը բացահայտելու, այդ երևույթի դեմ ակտիվ պայքար ծավալելու և այն հանրային քննարկման առարկա դարձնելու համար:
