«Շալկե»-ն հաղթեց «Վալենսիա»-ին և պայքարը կշարունակի Չեմպիոնների լիգայի քառորդ եզրափակիչում: Առաջին խաղակեսը շատ ակտիվ սկսեցին «չղջիկներ»-ը: Արդեն 7-րդ րոպեին նրանք կարող էին բացել հանդիպման հաշիվը, սակայն նպաստավոր դիրքում հայտնված Մատյեի հարվածն իր վրա ընդունեց «Շալկե»-ի պաշտպանը: Գոլը երկար սպասել չտվեց: 17-րդ րոպեին հյուրերի ճնշումը տվեց իր արդյունքը. «Վալենսիա»-ի թուրք լեգիոներ Թոփալը հեշտությամբ շրջանցեց մրցակցի պաշտպանին և նուրբ փոխանցումով գնդակը դրեց Կոշտայի գլխին` 0:1: Խփած գնդակից հետո հյուրերը սառեցրին խաղը և փորձում էին պահպանել իրենց ձեռնտու հաշիվը, ինչը վատ չէր ստացվում: Սակայն ինչպես սովորաբար լինում է նման դեպքերում, այն, ինչ չի ստացվում խաղի ժամանակ, ստացվում է ստանդարտ դիրքի ժամանակ: 40-րդ րոպեին Ջեֆերսոն Ֆարֆանը հրաշալի իրացրեց տուգանային հարվածը` 1:1:
Երկրորդ խաղակեսը տանտերերը շատ ավելի ակտիվ անցկացրին: 52-րդ րոպեին Վալենսիայի դարպասապահ Գուիտայի սխալից օգտվեց «Շալկե»-ի 21-ամյա հարձակվող Մարիո Գավրանովիչը, որը Ջեֆերսոն Ֆարֆանի հետ, անշուշտ, արժանի էր այս հանդիպման լավագույն խաղացող ճանաչվելուն: Ընդունած երկրորդ գոլից հետո «Չղջիկներ»-ն անմիջապես ակտիվացան, և Արիս Ադուրիսը հաշիվը հավասարեցնելու երկու հիանալի պահ չօգտագործեց: Սկզբում նա սուր անկյունից չկարողացավ գնդակն ուղարկել դատարկ դարպասը: Այնուհետև Խոակինը հրաշալի փոխանցումով նրան դուրս բերեց հարվածային դիրք, այս դեպքում արդեն Նոյերը անհավանական ցատկով փրկեց իր թիմին: Ուժերն անբողջությամբ կենտրոնացնելով հարձակման վրա` «Վալենսիա»-ն մրցակցին հակագրոհելու բազմաթիվ հնարավորություններ էր ընձեռում, որոնցից երկուսի ժամանակ Մարիո Գավրանովիչի հարվածները ետ մղվեցին դարպասաձողից: 90-րդ րոպեին հանդիպման վերջակետը դրեց նույն Ջեֆերսոն Ֆարֆանը: «Շալկե»-«Վալենսիա»` 3:1: Գելզենկիրխենցիները քառորդ եզրափակիչում են: