Հայաստանի Հանրապետությունը, թերևս, միակ երկիրն է աշխարհում, որտեղ գլխավոր դատախազը հայտնի է ոչ թե կոռուպցիայի դեմ պայքարում ունեցած հաջողություններով, այլ հասարակական գործունեությամբ: Կոռուպցիայի մեջ թաթախված երկրում Աղվան Հովսեփյանը նախ միասնության շուրջպար էր կազմակերպում Արագածի շուրջ, հետո միասնական ծառատունկ, հետո քարե տառերի պուրակ կառուցեց, հիմա էլ խաչ է տնկում այդ պուրակում: Այս ընթացքում Աղվան Հովսեփյանի գլխին ամպեր են կուտակվում Վարդան Օսկանյանի գործով:
ԱԺ նախագահ Հովիկ Աբրահամյանը արդեն մի քանի անգամ հայտարարել է, որ եթե պարզվի Օսկանյանն անմեղ էր, պատասխան են տալու այս գործը նախաձեռնողները: Երեկ այդ մասին նաև ՀՀԿ խմբակցության նախագահ Գալուստ Սահակյանն է հայտարարել: Իսկ պատասխան տվողներից առաջինը, բնականաբար, Աղվան Հովսեփյանը պետք է լինի, քանի որ հենց վերջինս էր Ազգային ժողովում պատգամավորներին հավաստիացնում, որ ճիշտը Օսկանյանին «հանձնելն» է: Այնպես որ, եթե Աղվան Հովսեփյանը չկարողացավ ապացուցել Օսկանյանի մեղքը կամ հանցանքը, ապա ամենայն հավանականությամբ հանրապետականները նրան են տալու նախընտրական փուռը:
Դրա համար էլ երևի Աղվան Հովսեփյանը որոշել է խաչ կառուցել` որպես կամ իր ապագա պաշտոնեա-քաղաքական նահատակության խորհրդանիշ, կամ էլ որպես փրկության հույս: Այսինքն` գլխավոր դատախազը միգուցե սրանով ցույց է տալիս, որ այլևս հույսը կարող է դնել միայն Սուրբ Խաչի և Աստծո օգնության վրա, քանի որ այլևս ոչ մի բան նրան չի օգնի, հատկապես այն բանից հետո, երբ Օսկանյանին սկսել են ինտենսիվորեն օգնության գալ արևմտյան դեսպանները: ԱՄՆ դեսպանի բավական կոշտ հայտարարությունից հետո Օսկանյանի դեմ քաղաքական հետապնդման մասին հստակ մեսիջով հանդես է եկել նաև Հայաստանում Մեծ Բրիտանիայի դեսպանը: Այսինքն` գլխավոր դատախազի վիճակը արդեն գրեթե անհույս է դառնում` կրիտիկական:
Իսկ այն, որ Օսկանյանի գործով ինչ-որ մեկի գլուխը պետք է անպայման թռնի, երևի թե կասկած չկա: Գործն ի սկզբանե ինքնին այնպիսին էր, որ գլուխներից խուսափել հնարավոր չէր: Հետևաբար, եթե դա Օսկանյանը չէ, ուրեմն որևէ այլ մեկն է: Աղվան Հովսեփյանն էլ հասկանում է, որ այդ մեկը հենց ինքն է լինում, ու ոչ միայն այն պատճառով, որ նա էր համոզում պատգամավորներին: Պարզապես Աղվան Հովսեփյանը չի տեղավորվում Սերժ Սարգսյանի իշխանական պատկերացումների շրջանակում, քանի որ, ըստ էության, բավական ուժեղ է և երևի թե կարելի է ասել, որ իր բևեռային ուժով երկրորդն է ԲՀԿ-ից հետո: Հետևաբար` Աղվան Հովսեփյանը անխուսափելիորեն հայտնվում է Սերժ Սարգսյանի համար անցանկալի և անվստահելի անձանց ցուցակում:
Լուսանկարը՝ PanARMENIAN Photo-ի
