Եգիպտոսի նախկին նախագահ Հոսնի Մուբարաքի պաշտոնանկությունից հետո ինտերնետում հայտնվել են փաստաթղթեր, որոնք վկայում են, թե, իբր, Հոսնի Մուբարաքը և նրա որդին` Գամալը 2005թ.-ին նախապատրաստել և իրականացրել են պայթյուններ ծովափնյա Շարմ Ալ-Շեյխ քաղաքում: Այս մասին գրում է գերմանական Der Spiegel-ը:
Թերթը գրում է, թե հնարավոր է հրապարակված փաստաթղթերից մի մասը կեղծիք է, սակայն նրանց մեջ բնօրինակներ էլ կան: Փաստաթղթերը հրապարակած անձինք նշում են, որ իրենք այդ փաստաթղթերը փրկել են Պետական անվտանգության ծառայության շենքի հրդեհի ժամանակ: Բնակչության շրջանում այդ ծառայությունը հայտնի էր «Մուբարաքի գեստապո» անվամբ: Նրանք պնդում են, որ շենքը դիտմամբ այրվել է ծառայության ներկայացուցիչների կողմից, որոնք դրանով փորձել են վերացնել իրենց կողմից գործած հանցանքների հետքերը:
Փաստաթղթերից մեկում նշվում է, թե ինչպես են իրականացվել հանդիպումներ մի քանի մարդկանց հետ, որոնց հետ քննարկվել է այդ պայթյունների տեղն ու ժամը: Սակայն թերթում չի նշվում, թե որը կարող էր լինել Մուբարքի վարչակազմի կողմից նման գործողություն իրականացնելու շարժառիթը:
Հիշեցնենք, որ 2005թ. Շարմ Ալ-Շեյխում տեղի էին ունեցել մի շարք պայթյուններ, որի հետևանքով զոհվել էր 88 մարդ, այդ թվում` օտարերկրյա զբոսաշրջիկներ: Այդ ժամանակ պատասխանատվությունը ստանձնել էին Ալ-Ղաիդան և մինչ այդ անհայտ «Եգիպտոսի մոջահեդներ» կազմակերպությունը: