Ո՞վ է ուժեղ՝ կի՞նը, թե՞ տղամարդը, ինչո՞ւ կապանցի կանայք չեն առաջադրվում քաղաքապետ կամ ավագանու անդամ, արդյո՞ք կինն է այսօր պահում ընտանիքը: Այս և նմանատիպ այլ հարցեր քննարկվեցին Կապանի կանանց ռեսուրս կենտրոնում հրավիրված կլոր սեղանի շուրջ:
Տարբեր սերնդի կանայք էին` ավագից մինչև երիտասարդ: Ակումբա-գրադարանային միավորման տնօրեն Սվետլանա Գևորգյանի խոսքով, ինքը դեմ է գենդերին, և ուզում է, որ միշտ «տղամարդը լինի տան գլուխ»:
Իսկ թե ինչու են կանայք քաղաքական առումով պասիվ, ըստ նրա՝ «կանայք, չնայած տղամարդկանցից ուժեղ են ու թասիբով, խելոք են, բայց նախանձ են»:
«Կինը եթե ուզենա, կարող է ամեն ինչ անել: Պիտի ասի` ես կարող եմ, ու կստացվի»,- ասաց «Վորլդ Վիժն» կազմակերպության` Կապանի ծրագրի աշխատակից Լուսինե Սարուխանյանը: Վերջինս նաև համաձայն չէր, որ քննարկումը առանց տղամարդկանց էր:
«Գենդերից ենք խոսում, բայց տղամարդկանց չենք հրավիրել, ամեն անգամ գալիս նստում ենք, խոսում ու գնում, և չենք իմանում տղամարդկանց կարծիքը»,- ասաց Լուսինեն: Վերջինիս հակադարձեց Կապանի քաղաքապետի մամուլի խոսնակ Հասմիկ Թովմասյանը` ասելով, թե «տղամարդիկ զահլա չունեն»: «Կգային, կնստեին, կասեին` հա, համաձայն ենք, բայց ոչինչ չէր փոխվի: Պետք է գործել»,- կանանց խորհուրդ տվեց Հ. Թովմասյանը:
Սրճարաններից մեկի մենեջերը ցանկություն հայտնեց, որ սյունեցի կանայք հաճախ սրճարան այցելեն: Մենեջերի խոսքով, «կանայք պասիվ են», ու եթե նման քննարկումները կազմակերպվեն սրճարանում, ապա իրավիճակը կփոխվի, ու մարզերում ապրող գեղեցիկ սեռի ներկայացուցիչները կակտիվանան:
Խոսեցին կանանց մասին կանանցով ու երկու ժամ քննարկումից հետո հիշեցին, որ «տուն-տեղ, երեխա ունեն»:
Մարտի 14-16-ը Կապանում առաջին անգամ անցկացվելիք բրիտանական ֆիլմերի փառատոնի թեման նույնպես կինն է:
Մարզկենտրոնում այն կազմակերպելուն աջակցում է «Երկյակ» ՀԿ-ն, որի ներկայացուցիչներն էլ, օգտվելով հարմար առիթից, փառատոնի մասին պատմող գրքույկները բաժանեցին մասնակից կանանց:
Վերջիներս խոստացան անպայման գնալ ու իրենց համեմատել արտասահմանում ապրող կանանց հետ: «Իհարկե, իրենք մեզ չեն հասնի, մենք էլ իրենց…»,- նման նոտայով ավարտվեց քննարկումը: