«Առաջին լրատվականի» զրուցակիցն է «Հանրապետական» կուսակցության անդամ, ԱԺ փոխնախագահ Սամվել Նիկոյանը:
– Պարոն Նիկոյան կոալիցիոն հուշագրի ստորագրումից հետո բոլորի մոտ տպավորություն ստեղծվեց, որ կոալիցիան առաջիկա խորհրդարանական ընտրություններին միասնական ցուցակով է մասնակցելու: ԲՀԿ-ական պատգամավորներից մեկը, սակայն, մեզ հետ զրույցում պնդում էր, որ իրենք առանձին են մասնակցելու ընտրություններին: Առանձին ցուցակը ինքնին ենթադրում է մրցակցություն, քննադատություն: Որքանո՞վ եք տրամաբանական համարում, որ կոալիցիայի մաս կազմող ուժերը առանձին ցուցակներով պետք է հանդես գան:
– Մենք ունենք ստորագրած հուշագիր, ներկոալիցիոն հարաբերություններ, այս պարագայում առաջնորդվել ՀՀԿ-ից կամ ԲՀԿ-ից ինչ-որ մի պատգամավորի ինչ-որ մի տեսակետով` կարծում եմ ավելորդ է: Մենք պետք է առաջնորդվենք նրանով` այն, ինչ ստորագրվել է, այն, ինչ ձևակերպվել է, այն, ինչ որ հիմա կա: Ավելին` ինչո՞ւ եք կարծում, որ պետք է բոլոր հայտարարությունները լուրջ ընդունել և բոլոր հայտարարությունները պետք է մեկնաբանել ու պատասխանել: Իսկ այն, որ պաշտպանում են Սերժ Սարգսյանի թեկնածությունը` դա բխում է կոալիցիոն հուշագրի շահերից: Ցանկանում եմ ասել, որ կա ստորագրված փաստաթուղթ, և այդ ստորագրված փաստաթուղթը աշխատում է: Այսօր գործընթացները կոալիցիոն ստորագրված փաստաթղթի տառին ու ոգուն համաձայն են զարգանում: Իսկ թե որևիցե անհատ պատգամավոր ինչ կասի` պետք չէ ուղղակի լուրջ ընդունել:
– Իսկ Դուք ի՞նչ եք կարծում` կոալիցիան միասնական ցուցակով կգնա՞ ընտրություններին, թե՞ առանձին:
– Անկեղծ ասած, այդ հարցին պատասխանելիս կա՛մ պետք է հետ գնանք, կա՛մ շատ առաջ անցնենք: Այս պահին ասել միասնական ցուցակով կմասնակցենք, թե առանց միասնական ցուցակի` դժվար է: Միաժամանակ որևիցե բան չի կարելի բացառել, քանի որ ներկոալիցիոն հուշագիրը ենթադրում է նաև ամենաբարձր աստիճանի համագործակցություն:
– Կարծիք կա, որ ԲՀԿ-ն հանրության մոտ ավելի մեծ վստահություն ունի, հետևաբար միասնական ցուցակով ընտրություններին մասնակցելը կարող է ավելի շատ կորստաբեր լինել, մինչ ՕԵԿ-ի համար միասնական ցուցակով մասնակցելը փրկության նման մի բան է:
– Դուք եթե կարծում եք, ես մտքեր կարտահայտեմ, որը որևէ կերպ կհակասի կամ վիրավորական կհնչի մեր կոալիցիոն գործընկերների վերաբերյալ, չարաչար սխալվում եք: Նման բան չկա: Մնացած հարցերը, որ դուք հնչեցնում եք, ենթադրությունների ոլորտից են կամ ցանկությունների ոլորտից: Այդ հարցերին պատասխանելու համար, նորից եմ կրկնում, կա՛մ պետք է շատ հետ գնանք, կա՛մ պետք է շատ առաջ ընկնենք, բայց միաժամանակ ստիպված ենք մեկ տարի սպասել:
– Հասարակական, սոցիալական լարումը օրեցօր մեծանում է, որը նաև իշխանության ներկայացուցիչները չեն ժխտում: Չե՞ք կարծում, որ դա կառավարության գործունեության ձախողման հետևանք է, ուստի գահավիժմանը սպասելու փոխարեն` արժե, որ կառավարությունում արմատական փոփոխություններ նախաձեռնողը հենց ինքը իշխանությունը լինի:
– Խնդիրն այն է, որ դեռևս երկու տարի առաջ շատ լուրջ պետության ղեկավարներ և քաղաքական գործիչներ կանխատեսում էին ֆինանսատնտեսական ճգնաժամը, սոցիալ-պոպուլիզմը և հնարավոր բողոքները` ընդհուպ մինչև խռովություն: Սրանք բոլորը կանխատեսելի և կանխագուշակելի էին: Հիմա տեսեք, մեզ մոտ ասում ենք` այո, կա ֆինանսատնտեսական ճգնաժամ և այլն, և այլն: Մենք ամբողջությամբ չենք հաղթահարել, խնդիրներ կան: Այս պահին, որ մեզ մոտ վատացել է` դա գնաճն է: Հիմա այսպիսի հարց, իսկ եթե չլիներ այս կառավարությունը, ինչպիսի՞ն կլիներ մեր տնտեսության և երկրի սոցիալական վիճակը: Ես ձեզ վստահաբար ասում եմ, որ շատ ավելի վատ: Մենք ունենք գրագետ կառավարության թիմ, որը կարողանում է բավականին ճկուն ձևով այս ճգնաժամին դիմակայել: Ամբողջ աշխարհն է ընկել այս ճգնաժամի որոգայթը, սակայն մեր կառավարությանը դեռևս հաջողվում է բացասական հետևանքներից զերծ մնալ: Կա գնաճ` բոլորս գիտենք, բոլորս հասկանում ենք, նամանավանդ սննդամթերքի կազմում է մեր սպառողական զամբյուղի ծանրակշիռ մասը: Ինձ թվում է` մի քանի ամիս հետո, երբ գյուղատնտեսական տարին, ըստ էության, կսկսվի, և Աստված տա, որ մեզ մոտ ամեն ինչ լավ լինի, այդ բոլոր խնդիրները կլուծվեն: Կարծում եմ, որ ապագա ամիսների ընթացքում գնաճը ոչ միայն մեզ մոտ կշարունակվի, այլև գները կկարգավորվեն: Հետևաբար այս պահին կադրային փոփոխությունների կարիք չկա: Ընդհակառակը մեր կառավարությանը մենք պետք է ամեն ինչով օգնենք, որ ժողովրդի առաջ ծանրացած խնդիրների լուծման քայլեր գտնի: Այսինքն` վարչապետին ոչ միայն չենք փոխելու, այլև անհրաժեշտ է իրան օգնել: