Վերահսկիչ պալատը ստուգումներ է սկսում Արարատի մարզում: Առաջին հայացքից այս արարողակարգային լուրն իրականում կարող է բավական լուրջ ներքաղաքական նշանակություն ունենալ` հաշվի առնելով մի քանի հանգամանքներ:
Նախ, արդեն ավանդույթ է դարձել, որ Վերահսկիչ պալատն իր ստուգումների ընթացքում տարբեր գերատեսչություններում և մարզերում հայտնաբերում է պետական բյուջեի միջոցների տասնյակ և հարյուրավոր միլիոն դրամների չարաշահումներ:
Այսինքն` առնվազն տարօրինակ, ու նաև շատ անհասկանալի կլինի, եթե հանկարծ Արարատի մարզը տարբերվի, եթե հանկարծ պարզվի, որ մարզը հրեշտակավան է, որտեղ պետական միջոցներ չեն յուրացվում: Դրան հազիվ թե որևէ ողջախոհ մեկը հավատա այն պատկերից հետո, որ պետական միջոցների տնօրինման հարցում երկու տարվա ընթացքում իր ստուգումներով բացահայտել է Վերահսկիչը:
Իսկ մյուս կարևոր հանգամանքն այն է, որ Արարատի մարզը համարվում է ԱԺ նախագահ Հովիկ Աբրահամյանի տիրույթը: Աբրահամյանը ծնունդով այդ մարզից է, այն գրեթե ամբողջությամբ գտնվում է Աբրահամյանների վերահսկողության տակ` պետական կառավարման մարմիններից մինչև մասնավոր սեփականության զգալի մասը: Վերջերս էլ մարզի ոստիկանապետ նշանակվեց Հովիկ Աբրահամյանի ազգականը:
Այսինքն` եթե Իշխան Զաքարյանը չարաշահումներ է հայտնաբերում մարզում, ապա դրանք աներկբայորեն առնչվելու են Հովիկ Աբրահամյանին: Այլ կերպ ասած` ստացվելու է, որ հենց Հովիկ Աբրահամյանն է այդ չարաշահումների հեղինակը կամ տանիքը: Իսկ չարաշահումների հայտնաբերումը, մեղմ ասած, շատ հավանական է` նկատի ունենալով ոչ միայն Վերահսկիչ պալատի վերջին տարիների գործունեության «ավանդույթները», այլ նաև Հովիկ Աբրահամյանի և Սերժ Սարգսյանի փոխհարաբերությունները:
Դրանք իհարկե լուրջ հակասություններ չեն պարունակում, սակայն Հովիկ Աբրահամյանը վերջին ժամանակաշրջանում դուրս է մնացել Սերժ Սարգսյանի համար վստահելիների շրջանակից, ինչի մասին վկայում էին այն մեծ ջանքերը, որ նա փորձում էր գործադրել իր խնամի Գագիկ Ծառուկյանին դեպի Սերժ Սարգսյանը թեքելու համար` ակնկալելով դրանով նաև ծառայություն մատուցել ու վստահություն ձեռք բերել Սերժ Սարգսյանի մոտ:
Ըստ երևույթին, Սերժ Սարգսյանը Գագիկ Ծառուկյանի հետ համաձայնության գալու հարցում չի օգտվել Հովիկ Աբրահամյանի ծառայությունից, այլապես հազիվ թե նախընտրական տարում նրան անցկացներ Իշխան Զաքարյանի «թրի» տակով:
Կասկած չկա, իհարկե, որ Հովիկ Աբրահամյանը դուրս կգա «թրի» տակից: Կամ ավելի ճիշտ` նրան դուրս կբերեն, չեն թողնի թրի տակ: Հարցն այն է, թե ինչ ձևով և ինչ տեսքով դուրս կբերեն, ու արդյոք նա դրանից հետո ի վիճակի կլինի՞ հավակնելու ներիշխանական գործընթացներում որևէ լուրջ դերակատարության:
