Կարծիք կա, որ շաբաթվա ամենավատ և ամենածանր օրը երկուշաբթին է: Սակայն, ինչպես պարզել են փորձագետները, մարդու տրամադրությունն այդ օրը ո´չ ավելի լավն է, ո´չ էլ ավելի վատը` ի համեմատ երեքշաբթիի, չորեքշաբթիի և հինգշաբթիի:
Նման եզրակացության են հանգել հետազոտողները հեռախոսային հարցման արդյունքում, որին մասնակցել է 340 հազար մարդ: Սթոունի Բրուկի համալսարանի հետազոտողները վերլուծել են մասնակիցների պատասխանները և եկել այն եզրակացության, որ մարդը հակված չէ ժպտալու առավոտյան մինչև 11:16-ը: Հարցվածների 50 տոկոսը առավոտյան ուշանում է և անարդյունավետ աշխատում:
Սակայն այդ կարծիքը սուբյեկտիվ է: Բրիտանացի 3000 աշխատողների շրջանում անցկացված հարցումները ցույց են տվել, որ երեքշաբթի` առավոտյան ժամը 11:45-ը ամբողջ շաբաթվա տառապանքների գագաթնակետն է: Չորեքշաբթի մարդկանց մոտ գործերն այնքան էլ հարթ չեն ընթանում: Պարզվել է, որ այդ օրը մարդիկ հակված են բացասական բառեր օգտագործել: Եվ չնայած մարդիկ հինգշաբթի չեն ուշանում աշխատանքից, ավելի շուտ են սկսում ժպտալ և զերծ են մնում բացասական արտահայտություններից, սակայն հենց այդ օրն է շաբաթվա ամենաանձրևոտ օրը: Այս մասին հայտնում է Rosbalt.ru-ն:
Նույնիսկ հանգստյան օրերն այնքան հանգիստ չեն, որքան ընդունված է կարծել: Հետազոտություններից մեկում ասվում է, որ կիրակին մարդիկ ընկալում են որպես շաբաթվա ամենասարսափելի օր, քանի որ դեպրեսիայի մեջ են հայտնվում երկուշաբթի աշխատանքի վերադառնալու մտքից:
