«Բարսելոնա»-ի գլխավոր մարզիչ Պեպ Գվարդիոլան Չեմպիոնների լիգայի խաղարկության քառորդ եզրափակիչ դուրս գալուց հետո ավելի շատ խոսել է մրցակցի, քան իր սաների ցուցադրած խաղի մասին:
«Ցավակցում եմ «Արսենալ»-ին. ինձ դուր է գալիս այդ թիմը: Մասնավորապես նրանց խաղաոճը», – ասել է Գվարդիոլան խաղից հետո տեղի ունեցած մամուլի ասուլիսի ժամանակ:
«Ես չգիտեմ` ինչ եզրակացության են եկել մեր մրցակիցներն այս հանդիպումից հետո: Հնարավոր է` նրանք կասեն, որ պարտության պատճառը Պերսիի ստացած կարմիր քարտն էր: Կամ նրանք այնուամենայնիվ կփորձեն ավելի իրատես լինել»:
«Եթե «Արսենալ»-ի ֆուտբոլիստներն իսկապես հավատում են, որ Վան Պերսիի հեռացումն էր նրանց քառորդ եզրափակիչ դուրս չգալու պատճառը, ապա թող այդպես էլ մտածեն. դա նրանց իրավունքն է, սակայն իրականությունն այն է, որ նրանք երեք փոխանցումից ավել չէին կարողանում կատարել»:
«Այս թիմը պետք է աճի և շարունակի զարգանալ: Դրա համար հարկավոր է մանրամասն ուսումնասիրել սեփական սխալներն ու փորձել կանխել դրանք: «Արսենալ»-ը պրակտիկորեն Անգլիայի առաջնության առաջատարն է, բայց «Բարսելոնա»-ի հետ խաղում նրանք այնքան էլ շատ հարվածներ չկատարեցին դարպասին, իսկ դա շատ բանի մասին է խոսում»:
