«Գործընկերություն հանուն բաց հասարակության» չորրորդ տարեկան զեկույցն ամփոփում է Հայաստանում Եվրոպական հարևանության քաղաքականության գործողությունների ծրագրի իրականացմանը 2010թ. ուղղված քայլերը և դրա արդյունավետությունը:
Մարդու իրավունքների հարցերին անդրադառնալով` զեկույցն ուսումնասիրել է նաև ԶԼՄ-ների ազատության ապահովման խնդիրները ու ոլորտի ներկա վիճակը: Կազմակերպությունը շատ է կարևորում ԶԼՄ-ների ազատությունը քաղաքացիական հասարակության ձևավորման համար, պատահական չէ, որ այսօր «Կոնգրես» հյուրանոցում այս թեմայի քննարկումով բացվեց Զեկույցի հրապարակումը: Անցկացված հետազոտության արդյունքները համառոտ ներկայացրեց Երևանի մամուլի ակումբի տնօրեն Բորիս Նավասարդյանը:
Զեկույցում մասնավորապես ասված է. «Հայաստանում գործող Հեռարձակման և ռադիոյի մասին օրենքը սահմանափակում է մամուլի ազատությունը և բազմակարծությունը: Օրենքում վերջերս կատարված փոփոխությունները (2010թ. հունիսի 10) թափանցիկ, իրավասու և արդար կարգավորման որևէ մեխանիզմ չեն սահմանում»:
«Օրենքում կատարված փոփոխությունները ոչ մի պրակտիկ արդյունք չտվեցին: Ոչ մեկի համար հայտնի չեն խաղի կանոնները: Այս բարդ ֆինանսական իրավիճակում ինչպե՞ս կարելի է ակնկալել ներդրումներ ոլորտում, եթե խաղի կանոնները հայտնի չեն: Տեխնիկական բարեփոխումները չպիտի սահմանափակեն բազմակարծությունը, ինչին մենք ականատես եղանք»,-ասում է Բորիս Նավասարդյանը` առանձնացնելով ոլորտի կարևորագույն խնդիրները:
Զեկույցում նշված մեկ այլ կարևոր խնդիրն այն է, որ Հեռուսատատեսության և ռադիոյի ազգային հանձնաժողովի (ՀՌԱՀ) կազմը ընտրվում է նախագահի և խորհրդարանի կողմից, ինչը թույլ է տալիս իշխանություններին կարգավորող մարմինը ձևավորել իրենց հայեցողությամբ:
Զեկույցը նաև քննադատում է այն փաստը, որ 2008թ. մարտի 1-ի դեպքերին հետևած տպագիր մամուլի ապօրինի և կանխակալ գրաքննությունը, ինչպես նաև ինտերնետային լրատվամիջոցների գործունեության ընտրովի կասեցումը չեն ստացել համապատասխան գնահատական:
Իրավիճակը բարեփոխելու նպատակով` «Գործընկերություն հանուն բաց հասարակության» կազմակերպությունը, ի թիվս այլ առաջարկությունների, խորհուրդ է տալիս նախատեսել օրենսդրական դաշտ, որը կկարգավորի թվային հեռարձակման հիմնական դերակատարների գործունեությունը և ՀՌԱՀ անդամների նշանակման այլ մեխանիզմ ընդունել: