Թուրքական Nethaber կայքի փոխանցմամբ, Լիբիայի նախագահ Մուամար Քադաֆին թուրքական TRT Türk հեռուստաալիքով հեռարձակվող «Մեր աշխարհի մանրամասները» հաղորդմանը տված հարցազրույցի ժամանակ անդրադարձ է կատարել թուրք-լիբիական հարաբերություններին. «Թուրքերը մեր եղբայրներն են, մենք դարերով միասին ենք ապրել, մենք բոլորս օսմանցիներ ենք»:
Ապա Քադաֆին խոսել է իր երկրի խնդիրներից` միաժամանակ գործի դնելով քրդական խաղաքարտը. «Արդեն 3 շաբաթ է, ինչ Լիբիայում ընթանում են մարտեր, ինչի համար մեր նկատմամբ ավիապատիժներ են սահմանվել: Սակայն ո՛չ ԱՄՆ-ը, ո՛չ էլ Եվրոպան համարժեք ուշադրություն չեն դարձնում Թուրքիայի վրա, ուր քրդերն իրավունք են պահանջում և ցանկանում են ստեղծել իրենց առանձին պետությունը: Թուրքական բանակն արդեն բազում տարիներ պատերազմում է քրդերի դեմ: Ինչո՞ւ Արևմուտքը նույնպիսի պատժամիջոցներ չի սահմանում Թուրքիայի նկատմամբ»:
Հիշեցնենք, որ թուրքական կողմը Լիբիայից տարհանել է 23,127 մարդու, որոնցից 4,178-ը Թուրքիայի քաղաքացիներ չեն: Այժմ թուրքական կողմը պլանավորել է Լիբիա առաքել 3 միլիոն դոլար արժողությամբ 708 տոննա հումանիտար օգնություն: