Քիչ առաջ «Առաջին լրատվականը» տեղեկացրել էր, որ Եգիպտոս է մեկնել Լիբիայի առաջնորդ Մուամար Քադաֆիի ինքնաթիռներից մեկը: Ստացվել է այդ լուրի պաշտոնական հաստատումը: Ըստ Reuters գործակալության՝ ինքնաթիռը Կահիրե է բերել Լիբիայի պաշտպանության նախարարության մատակարարման գծով վարչության պետ, գեներալ-մայոր Աբդ Ալ-Ռահման բեն Ալի Ալ-Սայիդ Ալ-Զաուիին:
Գործակալությունը հղում է կատարել Կահիրեի օդանավակայանի իր աղբյուրներին: Ավելի վաղ հայտնի էր դարձել, որ այդ ինքնաթիռը, թռչելով Տրիպոլիի օդանավակայանից, անցել է Մալթայի և Հունաստանի օդային տարածքներով: BBC-ն հաղորդում է, որ միանգամից երեք ինքնաթիռ է թռել Տրիպոլիից, որոնցից մեկը մեկնել է Աթենք, իսկ մյուսը` Վիեննա:
Իտալական La rebublican-ն էլ հայտնել է, որ լիբիական գեներալը Եգիպտոսի զինվորական իշխանությանն է բերել Քադաֆիի ուղերձը:
