Wikileaks-ի ռուսաստանյան գործընկեր Русский Репортер կայքը երկու նոր փաստաթուղթ է հրապարակել ԱՄՆ դիվանագիտական գրագրությունից:
Դրանցից մեկի համաձայն` ԱՄՆ-ը հույս է ունեցել, որ 2008-ի ռուս-վրացական պատերազմից հետո Ռուսաստանը կմատնվի միջազգային հանրության արհամարհական լռությանը, սակայն ռուսական իշխանությունները «խաղադրույք» էին արել Եվրոպայի անկախ կարծիքի վրա և չէին սխալվել:
Ռուսաստանում ԱՄՆ դեսպան Ջոն Բայերլին պետքարտուղարությանը հայտնել է, թե Մոսկվան ամեն գնով ցանկանում է ցույց տալ, որ միջազգային մեկուսացման մեջ չէ և փորձում է հարվածները ուղղել Եվրոպային ` «նոր համաշխարհային բալանսի» անհրաժեշտության մասին փաստարկներով:
Պատերազմից հետո ռուսաստանյան իշխանությունները մի շարք դիվանագիտական ու հրապարակային միջոցառումներ են իրականացրել՝ նպատակ ունենալով ցույց տալ, որ հարաբերությունները միջազգային հանրության հետ նորմալ հունով են ընթանում՝ չնայած ԱՄՆ պնդումներին:
Ամերիկյան մեկ այլ հաղորդագրության մեջ դեսպանը նշում է, որ Եվրոպան կանխատեսելիորեն առանձնացել է Մոսկվային մեկուսացնելու հարցում: Ռուսները, նրա կարծիքով, ուղիներ են փնտրել՝ վերադառնալու իրավիճակի «նորմալ հունին», իսկ ԱՄՆ-ն ու Եվրոպան շատ քիչ միջոցներ ունեն Ռուսաստանին վնասելու համար։
Սակայն ֆինանսական ճգնաժամը, որի պատճառներից մեկը ռուս-վրացական պատերազմն է եղել, թուլացրել է ՌԴ իշխանությունների դիրքերը: Բայերլին նաև գրել է, որ Ռուսաստանը շարունակելու է սեպ խրել ԱՄՆ-ի և դաշնակիցների հարաբերություններում:
Հրապարակված մեկ այլ փաստաթղթի համաձայն` Ուկրաինայում նախագահական ընտրությունների ժամանակ, ըստ 2009-ին Մոսկվայում Ուկրաինայի դեսպան Կոնստանտին Գրիշչենկոյի, որ ներկայումս երկրի արտգործնախարարի պաշտոնն է զբաղեցնում, Մոսկվան ցանկացել է այդ պաշտոնում տեսնել սպասարկու «խնամակալի»: Շեշտվում է, որ ՌԴ վարչապետ Վլադիմիր Պուտինը հույսը չի դրել Վիկտոր Յանուկովիչի վրա: Խաղադրույքը եղել է Յուլիա Տիմոշենկոյի վրա՝ չնայած Պուտինը կասկած է ունեցել նրան վստահելու հարցում:
Գրիշչենկոն Մոսկվայում ԱՄՆ դեսպանին ասել է, որ գազային սկանդալը Ռուսաստանի և Ուկրաինայի միջև լրջորեն վնասել է երկկողմ՝ առանց այդ էլ ոչ դրական հարաբերություններին: Դեսպանը բողոքել է, որ Մոսկվայում չեն լսում Ուկրաինայի դիրքորոշումը: