Լեռնային Ղարաբաղի նախագահի մամուլի խոսնակ Դավիթ Բաբայանը, մեզ հետ զրույցում անդրադառնալով Սոչիում կայացած նախագահների եռակողմ հանդիպմանը, արձանագրեց, որ այդ հանդիպման գնահատականը ընդհանուր առամբ դրական է։
«Այն առումով, որ, փաստորեն, հատուկ ընդգծվել է հակամարտության խաղաղ կարգավորման կարևորությունը, և Ռուսաստանը նաև ջանքեր է գործադրել, որպեսզի այդպիսի կետ մտցնի այնտեղ։ Միանշանակորեն, սա շատ կարևոր է, որովհետև նպաստում է կայունության պահպանմանը»,- նկատեց Դավիթ Բաբայանը։
Անդրադառնալով խնդիրներին՝ նա ավելացրեց. «Մյուս կողմից, իհարկե, կան խնդիրներ, որոնք ինչ-որ ձևով չեն նպաստում հակամարտության համապարփակ կարգավորմանը, այլ ավելի շուտ խոչընդոտ են հանդիսանում։ Դա նախ և առաջ խախտված ձևաչափն է, որովհետև այնտեղ չկա Արցախի անկախ Հանրապետությունը։ Իսկ մյուս խնդիրը Ադրբեջանի գործելաոճն է. չնայած բազմաթիվ նման հանդիպումներին, բազմաթիվ փաստաթղթերի և հայտարարությունների հրապարակմանն ու տարածմանը, նա շարունակում է իր ապակառուցողական քաղաքականությունը։ Արդյունքում մենք տեսանք, որ վերջին հանդիպման նախօրյակին հերթական անգամ զոհվեց պաշտպանության բանակի զինծառայողներից մեկը»։
Դավիթ Բաբայանի խոսքերով, ստեղծված իրավիճակը ցույց է տալիս, որ երևի պետք է ավելի հստակ քայլեր ձեռնարկել, որպեսզի Ադրբեջանը սկսի կառուցողական, կոնստրուկտիվ քայլեր հունի մեջ մտցնել։ Նա հույս հայտնեց, որ այդ գործընթացի սկիզբը կամաց-կամաց կդրվի։
