Վրաստանի արտգործնախարար Գրիգոլ Վաշաձեն ափսոսում է, որ հանգամանքների բերումով ստիպված է եղել հրաժարվել Ռուսաստանի քաղաքացիությունից. հաղորդում է newsru.com-ը:
«Ռուսաստանի քաղաքացիությունը և, ընդհանրապես, Ռուսաստանն իմ կյանքում մեծ նշանակություն ունի, անկախ նրանից՝ այդ երկրի քաղաքացիություն ունե՞մ, թե՞ ոչ: Համոզված եմ, որ մի օր որպես Վրաստանի քաղաքացի կժամանեմ Մոսկվա:
Անձնագիրս հանձնել եմ, քանի որ չէի կարող հանդուրժել, որ Դումայում որոշ «մտածող գլուխներ» պահանջեն խլել անձնագիրս: Եթե այդ հարցը չքննարկվեր Դումայում, անձնագիրս չէի հանձնի։ Եվ ինձ չէր հետաքրքրում ոչ մեկի կարծիքը»,- ասել է Վաշաձեն:
2010-ի հունիսին Վաշաձեն դիմել էր Ռուսաստանի իշխանություններին՝ պահանջելով իրեն զրկել ՌԴ քաղաքացիությունից:
Արտգործնախարարը նաև հրաժարվել է մեկնաբանել Ռուսաստանի ներքին իրավիճակը՝ շեշտելով որ անտակտություն կլինի մեկնաբանել մի երկրի ներքին իրավիճակը, որի հետ Վրաստանը չունի դիվանագիտական հարաբերություններ: