Հոկտեմբերի 31-ին Վազգեն Սարգսյանի անվան մարզադաշտում կայացած «Փյունիկ»-«Բանանց» հանդիպմանը ֆեդերացիայի նախագահի հրավիրած մրցավարը կարող էր մի ակնթարթ շուտ սուլել, բայց նա կարծես սպասեց «Բանանց»-ի դարպասի գրավմանը:
«Փյունիկ»-ի կազմից բացակայում էր մեր առաջնության գլխավոր ռմբարկու եւ ազգային հավաքականի հարձակվող Գեւորգ Ղազարյանը, բայց առանց նրա էլ «Փյունիկ»-ի հարձակողական անվանական կազմը շատ ուժեղ էր: Հանդիպումը վարում էր իտալական մրցավարական բրիգադը` Անդրեա Ռոմեոյի գլխավորությամբ: Հանդիպմանը ներկա էր նաեւ ֆեդերացիայի նախագահ Ռուբեն Հայրապետյանը. նա եկել էր հետեւելու «Փյունիկ»-ի խաղին:
Հանդիպման հենց սկզբից ակնհայտ էր, որ «Փյունիկ»-ի ֆուտբոլիստների համար շատ դժվար է լինելու: Խաղասկիզբը անցավ հավասար պայքարում` գնդակը գտնվում էր «Փյունիկ»-ի ֆուտբոլիստների մոտ, իսկ «Բանանց»-ի ֆուտբոլիստները գործում էին հակագրոհների սկզբունքով: Արդեն 12-րդ րոպեին Բետոն Օրտեգան մեն-մենակ դուրս եկավ «Փյունիկ»-ի դարպասապահ Արտուր Լեսկոյի դեմ, բայց «Բանանց»-ի հարձակվողը շատ անհաջող գործեց: «Փյունիկ»-ի դարպասը գրավելու երկրորդ հնարավորությունը կորցրեց Արսեն Բալաբեկյանը: Նշենք, որ այս առաջնությունում «Բանանց»-ը միակ ակումբն է, որը դեռեւս պարտություն չէր կրել «Փյունիկ»-ից: Ընդհանուր առմամբ, առաջին խաղակեսում թիմերը չէին ցանկանում բացել խաղաքարտերը: Իսկ ահա երկրորդ խաղակեսի հենց սկզբից մրցակիցները սկսեցին բաց ֆուտբոլ խաղալ. դրությունն էր ստիպում: Առաջին հերթին «Փյունիկ»-ին էր օդի պես պետք հաջողության հասնել, ուստի նրանք առաջ նետվեցին` ժամանակ առ ժամանակ մոռանալով պաշտպանության մասին, որից օգտվում էին «Բանանց»-ի ֆուտբոլիստները, բայց նրանց այդպես էլ չհաջողվեց գրավել «Փյունիկ»-ի դարպասը, չնայած բազմաթիվ գեղեցիկ դրվագներին: Միայն երկրորդ խաղակեսի սկզբին «Բանանց»-ի ֆուտբոլիստները կարող էին «Փյունիկ»-ի դարպասը առնվազն երկու անգամ գրավել, ինչից հետո «Փյունիկ»-ի գլխավոր մարզիչ Վարդան Մինասյանը խաղադաշտ դուրս բերեց եւս 2 հարձակվողի. «Փյունիկ»-ը ոչինչ չուներ կորցնելու, քանի որ նրա համար ոչ-ոքին հավասար էր պարտության: 63-րդ րոպեին «Փյունիկ»-ի ֆուտբոլիստներն այս խաղում առաջին անգամ մրցակցի դարպասը գրավելու հնարավորություն ունեցան. անկյունայինի խաղարկումից հետո, երբ գնդակը հայտնվեց պաշտպան Արտակ Եդիգարյանի մոտ, վերջինս ուժեղ հարված կատարեց, բայց «Բանանց»-ին փրկեց դարպասաձողը: Հանդիպումը մոտենում էր ավարտին, եւ իտալացի մրցավարը ավելացրեց 4 րոպե, այնքան, որքան պետք էր Կառլեն Մկրտչյանին: Խաղի ամենավերջում, հանդիպման մրցավարը արդեն պատրաստվում էր ազդարարել խաղի ավարտը, բայց եւս մի ակնթարթ հապաղեց, եւ երբ «Փյունիկ»-ի ֆուտբոլիստ Կառլեն Մկրտչյանը գրավեց դարպասը, նոր միայն սուլեց եւ ազդարարեց հանդիպման ավարտը: Իհարկե, սա ուշագրավ իրավիճակ էր, որը գուցե դեռ ուսումնասիրության եւ հետեւություններ անելու կարիք ունի, սակայն ամեն դեպքում փաստ է նաեւ այն, որ «Բանանց»-ի պարտության համար առաջին հերթին մեղավոր են հենց իրենք, քանի որ «Փյունիկի» դարպասը գրավելու բազմաթիվ հնարավորություններ ունեին, որոնք չկարողացան օգտագործել: Իսկ այս խաղից հետո արդեն կարելի է ասել, որ հազիվ թե ինչ-որ բան խանգարի «Փյունիկ»-ի չեմպիոնությանը: Այս տարի էլ ոչինչ չփոխվեց: