Ինչպես հաղորդում է Սպիտակ տան մամուլի ծառայությունը, երեկ ԱՄՆ նախագահ Բարաք Օբաման և Մեծ Բրիտանիայի վարչապետ Դևիդ Քեմերոնը որոշել են համատեղ գործել Լիբիայի առաջնորդ Մուամար Քադաֆիին հրաժարականին հասնելու գործում: Օբաման և Քեմերոնը խոսել են նաև Լիբիայում կայունություն և խաղաղություն հաստատելու գործում միջազգային ջանքերի համակարգման անհրաժեշտության մասին:
Միջազգային հանրությունն այս օրերին ակտիվ քննարկում է նաև Լիբիայի օդային տարածքը փակելու հարցը, ինչը կզրկի Մուամար Քադաֆիին օդուժը սեփական ժողովրդի դեմ օգտագործելու հնարավորությունից: Այդ մասին երեկ խոսել է նաև ԱՄՆ պետքարտուղար Հիլարի Քլինթոնը` նշելով, որ որոշումը պետք է ընդունվի ՄԱԿ-ի շրջանակներում. «Այս հարցում մեզ անհրաժեշտ է միջազգային հանրության աջակցությունը»,- ասել է նա: Ընդ որում, Քլինթոնը հատուկ շեշտել է, որ այդ որոշումը չպետք է կայացնի մեկ պետություն կամ արաբական երկրները, այլ միջազգային հանրությունը միահամուռ պետք է որոշում կայացնի: Ավելի վաղ օդային տարածքը փակելու մասին հայտարարել էր Իսլամական կոնֆերանս կազմակերպությունը (ԻԿԿ): Ինչպես նշել է ԻԿԿ գլխավոր քարտուղար Էքմելեդին Իհսանօղլուն` այս քայլով Քադաֆին կզրկվի իր հիմնական զենքերից մեկից` օդուժից:
Մինչդեռ երեկ Քադաֆիին ապստամբների դեմ է ուղղել բանակի ողջ հզորությունը` տանկերը և ռազմական ինքնաթիռները: Թեպետ նախկինում պետական լրատվամիջոցները հայտնում էին, որ Ալ-Զաուիյա քաղաքը, որը մայրաքաղաք Տրիպոլիից գտնվում է 50 կմ հեռավորության վրա գտնվում է իշխանությունների ձեռքում, սակայն երեկ այնտեղ կատաղի մարտեր են արձանագրվել: Ինչպես փոխանցում է Al-Jazeera հեռուստաալիքը, սպանվածների թիվը հասնում է մի քանի հարյուրի, հիվանդանոցներն ի վիճակի չեն ընդունել վիրավորներին, քանի որ բոլոր տեղերը զբաղված են: Բախումները մյուս քաղաքներում նույնպես շարունակվում են:
