ԱԺ-ում, ինչպես տեղեկացրել էինք, քննարկման է ներկայացված Քրեական օրենսգրքում փոփոխություններ և լրացումներ կատարելու օրենքի նախագիծը։ Ինչպես հայտնի է՝ Խորհրդային միության տարածքում գողության և խուլիգանության մասով ամենախիստ պատժաչափը Հայաստանում է սահմանվում։
Այսօր փաստաբան Հովիկ Արսենյանից փորձեցինք ճշտել՝ կո՞ղմ է, որ այս հոդվածների պատժաչափերը կրճատվեն։ «Միանշանակ դժվար է ասել՝ կո՞ղմ եմ, թե՞ ոչ, որ կոնկրետ խուլիգանության և գողության պատժաչափերը կրճատվեն։ Հատկապես այն դեպքում, երբ առանց այն էլ խուլիգանությանը կրճատվել է. 1, 2, 3-րդ մասերը նախատեսում են մինչև 3 տարի ազատազրկում։ 4-րդ մասն է, որ 4-7 տարի է նախատեսում։
Ես ընդհանրապես այլ տարբերակի կողմնակից եմ։
Մենք այնպիսի պետություն ենք, որ կայացման փուլում ենք, փոքր ազգ ենք։ Հետևաբար, յուրաքանչյուր քաղաքացու հանրօգուտ աշխատանքով զբաղվելը, ներկայությունը ընտանիքում, հասարակության մեջ խիստ կարևորվում են։ Այս պայմաններում չպետք է դիտարկել քրեական դատավարություն, քրեական օրենսգիրք, քրեական պատասխանտվություն միայն ազատազրկմամբ։
Ես միշտ կողմնակից եմ եղել, որ սանկցիաները լինեն խիստ տուգանքներ։ Ինչի արդյունքում նաև ազատազրկման վայրերում կուտակումներ չեն լինի»,- ասաց Հովիկ Արսենյանը։
Նրա խոսքերով, անձը կամ հարազատները մեծ գումարներ են ծախսում այդ կալանավորին պահելու համար, շորթում ու կաշառք է ծավալվում՝ սկսած իրավապահ մարմիններից վերջացրած դատարաններով, որ պատժաչափերը կրճատվեն։
«Հետևաբար, ավելի լավ է՝ տուգանք նշանակեն 5 միլիոն դրամ, 7 միլիոն դրամ։ Միևնույնն է, այդ գումարը, այսպես թե այնպես, ծախսվում է, սակայն այս տարբերակով կգնա պետական բյուջե»,- կարծում է փաստաբան Հովիկ Արսենյանը։