ԱԺ ձմեռային նստաշրջանում Քրեական օրենսգրքում փոփոխություններ և լրացումներ կատարելու օրենքի նախագիծ ներկայացվեց։ Այն մեծ հետաքրքրություն առաջացրեց ազատազրկվածների շրջանում։ Նրանց մասնավորապես հետաքրքրում է՝ օրենքի փոփոխությունները արդյոք պատժաժամկետների կրճատում սահմանո՞ւմ են, թե՞ ոչ։
ԱԺ պատգամավորները դեռ հրաժարվում են մեկնաբանություններ տալուց՝ պատճառաբանելով, թե իրենց ձեռքի տակ դեռևս լրամշակված տարբերակ չկա, որ մեկնաբանեն։ Միայն ՀՀԿ-ական Ռաֆիկ Պետրոսյանը նշեց, որ փոփոխությունները կանդրադառնան կրկնակիրառության վրա, որը կտարածվի շուրջ 1000 ազատազրկվածների վրա։
Այսօր մենք օրենքի փոփոխության շուրջ զրուցեցինք նաև փաստաբան Հովիկ Արսենյանի հետ։ Նա ևս նշեց, որ իր ձեռքի տակ փոփոխություների նախագիծը չկա, հետևաբար դժվարանում է մեկնաբանություններ տալ։ Իսկ կրկնակիրառությունը, նրա խոսքերով, մի նոր հասկացողություն է, որն անձամբ իր համար անհասկանալի է։ «Երբ ընդունվում էր ներկայիս գործող Քրեական օրենսգիրքը, ասում էինք, որ հումանիստական, դեմոկրատական սկզբունքներ կան։
Դժբախտաբար, վերջին 7-8 տարում, դրա ընդունվելուց հետո բազմաթիվ փոփոխություններ են եղել, նոր մասեր են ավելացվել, սանկցիաներն են խստացվել։ Հետևաբար, չեմ կարող ասել, թե նորը ինչ տեսք կունենա»,- ասաց Հովիկ Արսենյանը։
