Ֆորմուլա 1-ի գործող չեմպիոն Սեբաստիան Ֆետելը, ով հանդես է գալիս «Ռեդ Բուլ» թիմի կազմում, Կորեայի հաղթական գրան պրիից հետո կիսվել է տպավորություններով:
«Կարծում եմ`այս օրը շատ լավ դասավորվեց թե՛ իմ, թե՛ թիմի համար: Շատ կարևոր էր լավ մեկնարկը: Ես կարողացա ավելի լավ արագանալ, քան Մարկը, որից հետո մենք հավասարվեցինք, բայց ես ավելի նպաստավոր դիրքում էի ու կարողացա լավ անցնել շրջադարձը, ու կարողացա արդեն 4-րդ շրջադարձից դուրս գալ առաջին հորիզոնական:
Այսօր միակ սխալս եղավ անիվների արգելափակումը երրորդ շրջադարձում, բայց այս անվադողերով բոլորը աշխատում են հնարավորության սահմաններում: Անհնար է շատ ուժեղ գրոհելը, իսկ առջևի աջ անվադողը հաճախ վատ վիճակում էր: Մենք կարողացանք առաջ պոկվել առաջին ու երկրորդ հատվածներում և պահպանել առավելությունները երրորդում: Ամեն հնարավոր բան կանենք, որ մնանք այս դիրքում: Պետք է ոչ մի բան չբարդացնենք ու շարունակենք կատարել մեր աշխատանքը»,- Ֆետելի խոսքերը մեջբերում է թիմի պաշտոնական կայքը: