ՀՀ ԱԺ նախագահ Հովիկ Աբրահամյանը հոկտեմբերի 12-ին ընդունել է Իտալիայի Հանրապետության Սենատի և Պատգամավորների պալատի Իտալիա-Հայաստան պատգամավորական բարեկամության խմբի անդամներին, ովքեր ներկայացնում են խորհրդարանում գործող հիմնական խմբակցությունները:
ՀՀ ԱԺ մամուլի և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ ողջունելով հյուրերին` ԱԺ նախագահը կարևորել է Իտալիայի խորհրդարանական պատվիրակության այցը Հայաստան և նշել, որ այն առաջինն է բարեկամության խմբերի մակարդակով և, վստահաբար, նոր էջ կբացի ինչպես առհասարակ հայ-իտալական, այնպես էլ միջխորհրդարանական հարաբերություններում:
Անդրադառնալով հայ-իտալական համագործակցությանը` Հովիկ Աբրահամյանը նշել է, որ եկկողմ հարաբերություններն ունեն զարգացման լավ հեռանկարներ քաղաքական, տնտեսական, մշակութային և այլ բնագավառներում: Նրա համոզմամբ` հայ-իտալական միջխորհրդարանական կապերն ավելի արդյունավետ զարգացնելու առումով անհրաժեշտ է օգտագործել համագործակցության հնարավոր բոլոր ձևաչափերը, այդ թվում փոխգործակցությունը միջազգային խորհրդարանական կառույցներում: Իտալիա-Հայաստան պատգամավորական բարեկամության խմբի ղեկավար Սանդրա Ձամպան շնորհակալություն է հայտնել Հայաստան այցելեու հրավերի համար և կարևորել նման հանդիպումները միջպետական և միջխորհրդարանական կապերը զարգացնելու առումով:
Տիկին Ձամպան բարձր է գնահատել հայ ժողովրդի ներդրումը եվրոպական և մասնավորապես իտալական մշակույթի, գիտության, տնտեսության և այլ ոլորտներում: Նրա խոսքով` հայերը դարեր շարունակ մեծ հետք են թողել եվրոպական մշակույթի և տնտեսության մեջ: «Այժմ Եվրոպան պետք է վերադարձնի ձեզ այն, ինչ դուք երկար տարիներ ներդրել եք Եվրոպայում և պիտի զորավիգ լինի ձեր պետության կայացմանը»,- նշել է իտալացի պատգամավորը: Սանդրա Ձամպան տեղեկացրել է, որ Իտալիայի խորհրդարանում շրջանառության մեջ է դրվել օրինագիծ, որով ապրիլի 24-ը Իտալիայում պետականորեն կհամարվի Հայոց ցեղասպանության զոհերի հիշատակի օր:
Հանդիպմանը անդրադարձ է եղել տարածաշրջանային խնդիրներին, հայ-թուրքական հարաբերություններին, ԼՂ հիմնախնդրի կարգավորմանը: ԱԺ նախագահը նշել է, որ Ադրբեջանում պետական մակարդակով արմատավորված հայատյացության մթնոլորտը պետք է բավարար հիմք հանդիսանա միջազգային հանրության համար հասկանալու, որ ոչ մի դեպքում և ոչ մի ձևաչափով Արցախը չի կարող մաս կազմել մի երկրի, որը հերոսացնում է սաֆարովների կերպարը և իր այս քայլով Ադրբեջանը հեթական անգամ վտանգում է տարածաշրջանային փխրուն անվտանգությունը, ոտնահարում միջազգային իրավական փաստաթղթերով երաշխավորված մարդու իրավունքները, կրկին ի ցույց է դնում Լեռնային Ղարաբաղի հիմնախնդրի խաղաղ կարգավորման բանակցային գործընթացը փակուղի տանելու և դրանում միջազգային հանրության, մասնավորապես՝ ԵԱՀԿ Մինսկի խմբի համանախագահների կատարած աշխատանքը ձախողելու իր հետևողական քաղաքականությունը:
«Բաքուն հայատյացությունը դարձրել է պետական քարոզչություն՝ հասցնելով այն առավել քան վտանգավոր մակարդակի: Սա միայն մեր գնահատականը չէ. այս մասին ահազանգում են նաև միջազգային կառույցները: Մենք հավատարիմ ենք մնում Լեռնային Ղարաբաղի հիմնախնդրի խաղաղ կարգավորման` ԵԱՀԿ Մինսկի խմբի եռանախագահների միջնորդությամբ ընթացող գործընթացին»,- շեշտել է Հովիկ Աբրահամյանը:
ԱԺ նախագահը շնորհակալություն է հայտնել իտալացի պատգամավորներին, որ մերժել են Իտալիայի խորհրդարանում շրջանառության մեջ դրված Լեռնային Ղարաբաղի վերաբերյալ Ադրբեջանի տեսակետները արտահայտող և խիստ միակողմանի բնույթ կրող բանաձևը, ինչին ի պատասխան տիկին Ձամպան նշել է, որ ադրբեջանամետ բանաձևը մերժվել է, քանի որ այն չէր արտահայտում Իտալիայի տեսակետը հիմնախնդրի կարգավորման վերաբերյալ և չէր համապատասխանում Իտալիայի դիրքորոշմանը միջազգային ատյաններում:
Հանդիպմանը քննարկվել են այլ հարցեր ևս:
