Միացյալ ազգերի կազմակերպության գլխավոր քարտուղար Պան Գի Մունը կոչ է արել Իսրայելին ազատ արձակել պաղեստինցի խղճի գերիներին, որոնք գտնվում են այդ երկրի բանտերում: Այս հայտարարությամբ գլխավոր քարտուղարը հանդես է եկել` ելույթ ունենալով Վիենայում կազմակերպված միջազգային կոնֆերանսում, որը նվիրված էր պաղեստինյան հարցին:
«Այդպիսի քայլը (ազատումը.– 1in.am) կարող է նպաստել վստահության հաստատմանը»,- ասել է Պան Գի Մունը: ՄԱԿ-ի գլխավոր քարտուղարը նաև նշել է, որ ձերբակալվածների մեջ 200 մեծահասակների հետ մեկտեղ կան և նույնքան անչափահասներ: Պան Գի Մունը նաև կոչ է արել ազատ արձակել Գիլատ Շալիտին, որը 4 տարի է՝ գտնվում պաղեստինյան գերության մեջ:
Խոսելով բանակցային գործըթնացի մասին՝ Պան Գի Մունը նշել է, որ այն հայտնվել է փակուղում, քանի որ իսրայելցիները չեն դադարեցնում շինարարությունը պաղեստինյան տարածքներում, ինչն էլ դժվարացնում է բանակցությունների հետագա ընթացքը: