ԱՄՆ նախագահ Բարաք Օբաման երեկ հայտարարել է, որ ԱՄՆ-ն և ՆԱՏՕ-ն քննարկում են լիբիական ճգնաժամը հաղթահարելու մի քանի տարբերակներ, այդ թվում` ռազմական միջամտության հնարավորությունը: ԱՄՆ ղեկավարն ասել է, թե «անընդունելի են այն բռնությունները, որոնք լիբիական կառավարությունը կիրառում է սեփական ժողովրդի դեմ»: Այս մասին հաղորդում է Associated Press գործակալությունը:
«Ես ցանկանում եմ Քադաֆիի շրջապատին հստակ հասկացնել, որ հենց ինքն է որոշում, թե ինչպես գործել ստեղծված իրավիճակում: Եվ հենց նրա վրա է լինելու Լիբիայում բռնաճնշումների շարունակության պատասխանատվությունը»,- ասել է Օբաման Ավստրալիայի վարչապետ Ջուլիա Գիլարդի հետ հանդիպումից հետո:
Երեկ Ֆրանսիան և մեծ Բրիտանիան սկսել են մշակել ՄԱԿ-ի Անվտանգության խորհրդին ներկայացվելիք նոր բանաձևը, համաձայն որի, Լիբիայի ողջ օդային տարածքը պետք է փակ լինի ցանկացած օդանավի համար: Սա արվում է Քադաֆիի կողմից ընդդեմ խաղաղ բնակչության ռազմական ինքնաթիռների օգտագործումն անհնար դարձնելու համար:
Ճապոնիան, իր հերթին, հայտարարել է, որ արգելափակում է Լիբիայի առաջնորդ Մուամար Քադաֆիի և նրա մերձավորների բոլոր հաշվեհամարները։ «Ճապոնիան կսառեցնի այսօր Քադաֆիի և ևս վեց լիբիացիների հաշվեհամարներ»,- հայտարարել է Ճապոնիայի ֆինանսների նախարար Յոշիհիկո Նոդան: Ճապոնիայում հայտարարել են, որ այս քայլն ուղղված է ՄԱԿ-ի համապատասխան բանաձևը կատարելուն, որով պատժամիջոցներ են կիրառվել Քադաֆիի և նրա ընտանիքի ու շրջապատի նկատմամբ: