Հայ ազգային կոնգրեսի արտաքին հարաբերությունների հանձնաժողովի անդամ Վլադիմիր Կարապետյանն «Առաջին լրատվականի» հետ զրույցում Սոչիում ստորագրված հայտարարության վերաբերյալ երեք հիմնական նկատառում արտահայտեց: Նա ուշադրություն հրավիրեց այն փաստի վրա, որ ստորագրված հայտարարության մեջ նշված է, որ կողմերը կձգտեն ԼՂ խնդիրը խաղաղ ճանապարհով լուծել, մինչդեռ նախկին բոլոր հայտարարություններում հստակ ամրագրված էր կոնֆլիկտը բանակցությունների միջոցով խաղաղ ճանապարհով լուծելու հրամայականը: Կարապետյանը համեմատության համար որպես օրինակ բերեց Մայնդորֆյան հռչակագիրը:
Բացի այդ, ըստ Վլադիմիր Կարապետյանի` Աստրախանում նախորդ տարվա հոկտեմբերին ստորագրված հռչակագրում նշված էր, որ պետք է ռազմագերիների և դիակների փոխանակում արվեր: Մինչդեռ, Կարապետյանի խոսքերով, առայսօր Ադրբեջանը որևէ ռազմագերի չի վերադարձրել Հայաստանին: «Այնուամենայնիվ, Սերժ Սարգսյանը կրկին ստորագրում է ռազմագերիների վերադարձի մասին փաստաթուղթ, և վստահ չեմ, որ այս անգամ էլ որևէ ռազմագերի կկարողանանք ստանալ: Հոկտեմբերին փաստաթուղթը ստորագրելուց հետո հայկական կողմը որևէ բողոք չի ներկայացրել միջազգային հանրությանը, անգամ միջնորդներին առ այն, որ Ադրբեջանը չի կատարում իր առաջ ստանձնած պարտավորությունը»,- նշեց նա:
Կարապետյանն ուշադրություն հրավիրեց այն փաստի վրա, որ Սերժ Սարգսյանն Ալիևի հետ ուրախ ժամանց էր անցկացնում` այն դեպքում, երբ հանդիպումից մեկ օր առաջ ադրբեջանցիները մեկ զինվորի էին սպանել և ևս մեկին վիրավորել: «Այս ֆոնի վրա անցկացնել հանդիպում, ծիծաղելով գնալ բանակցությունների, հետո` ժամանակ անցկացնելու, ինձ համար առնվազն տհաճ էր»,- նշեց նա: Իսկ հայտարարության ստորագրումը Կարապետյանը որակեց որպես պարզապես դեմքը փրկելու միջոց:
