Փորձագետ Սերգեյ Մինասյանը, մեկնաբանելով Սոչիում Սարգսյան-Ալիև-Մեդվեդև հանդիպումը, կարծիք հայտնեց, որ դրական է, որ շարունակվում են բանակցությունները:
Ըստ նրա` Ադրբեջանն այդքան էլ սիրով չի գնում բանակցության, և եթե ամրագրվում է, որ դրանք շարունակվելու են, ինչպես նաև ասվում է խաղաղ ճանապարհով հարցերը լուծելու համաձայնության մասին, ապա դա կարելի է նրա կողմից համարել փոքր զիջում: Միևնույն ժամանակ նա նշեց, թե բացի ԵԱՀԿ ՄԽ ֆորմատից, այլևս գործում է մեկ այլ` եռակողմ ֆորմատ` ՀՀ-Ադրբեջան-ՌԴ: Նա նշեց, թե գերտերությունների կողմից կա որոշակի համաձայնություն այս ֆորմատին, և դա եղել է 2008թ. օգոստոսյան պատերազմից հետո: Սակայն փորձագետը կարծում է, որ եթե միայն ՌԴ դիրքերն ուժեղանան, ապա ՀՀ համար մանիպուլյացիայի հնարավորությունները կնվազեն, քանզի երեք դերակատարների հետ պայմանավորվածություններում հեշտ է խաղարկելը:
Քաղաքագետ Մանվել Սարգսյանի կարծիքով, այսօր Ադրբեջանը զբաղված է ոչ միայն շանտաժով, այլ նաև բանակցային ամեն մի փուլում հայ զինվորներ է սպանում` նպատակ ունենալով շանտաժն ավելի համոզիչ դարձնել: Ուստի, Մանվել Սարգսյանն առաջարկում է, որ Հայաստանն այնպիսի փոփոխություն մտցնի իր քաղաքականության մեջ, որ Ադրբեջանն ինքը վախենա մինչև բանակցություններն անգամ մի կրակոց արձակել:
«Եթե բանակցություն է նշանակված, և հայ զինվոր է սպանվում, ապա պետք է քայլ անել: Օրինակ` ճանաչել Ղարաբաղի անկախությունը, ինչի մասին հայտարարվել է Հայաստանի կողմից, կամ առնվազն չգնալ բանակցությունների: Սա կստիպի Ադրբեջանին հրաժարվել այս արատավոր պրակտիկայից»,- նշեց նա: Մանվել Սարգսյանի խոսքերով, Հայաստանի համար թանկ է ամեն մի զինվորի կյանքը, և քանի որ բանակցությունները կարող են դեռ տարիներ շարունակվել, ՀՀ-ն չի կարող պարբերաբար զինվորների կյանքը տալ: