Այսօր հոգեկան առողջության միջազգային օրվա կապակցությամբ լրագրողների հետ հանդիպման ժամանակ հոգեկան առողջության մասին խոսեցին ԱՆ գլխավոր հոգեբույժ Սամվել Թորոսյանը և ԵՊՀ ընդհանուր հոգեբանության ամբիոնի վարիչ Հրանտ Ավանեսյանը:
Սամվել Թորոսյանն ասաց, որ հոգեկան առողջությունը առողջության անբաժանելի մասն է: Բանախոսը նաև ներկայացրեց հոգեկան առողջության միջազգային սահմանումը՝ հոգեկան առողջությունը ոչ միայն հիվանդության բացակայությունն է, այլև լիակատար ֆիզիկական, հոգեկան, սոցիալական բարեկեցության վիճակը: Բժշկի գնահատմամբ՝ դա մի վիճակ է, որն անհրաժեշտ է բոլորիս, քանի որ դեպրեսիաները համաշխարհային պրոբլեմ են:
«Առավոտյան, երբ գալիս էի, տեսա, որ մի երեխա մոտեցավ իր դասընկերուհուն, վերցրեց պայուսակը և փախավ, փողոցում բոլորի տրամադրությունը բարձրացավ: Ուզում եմ ասել, որ մենք ուշադիր, հոգատար պետք է լինենք մեր շրջապատի նկատմամբ: Կյանքի բոլոր փուլերում պետք է հոգ տանենք, որ ունենանք առողջ սերունդ:
Հոգեկան առողջության խաթարումը կարող է վնաս հասցնել նաև երկրին: ԱՄՆ-ում հետազոտություն են իրականացրել՝ ապացուցելով, որ դեպրեսիաներն անդրադառնում են տնտեսության վրա, քանի որ մարդիկ ժամանակ առ ժամանակ չեն գնում աշխատանքի և այլն»,- մանրամասնեց Ս. Թորոսյանը՝ շարունակելով, որ ամբողջ աշխարհում թվի ավելացման միտում կա, ինչը պայմանավորված է համաշխարհային ճգնաժամով: Ըստ բանախոսի՝ Հայաստանում հաշվառված հոգեկան հիվանդները 45 հազար են, որոնց շարքում կանայք քիչ են, քանի որ խուսափում են ստացիոնար բուժումից:
Հայաստանում սթրեսածին կյանքում շատ են ազդակները, որոնք կարող են հոգեկան խանգարման բերել:
Համատեղ ասուլիսի ընթացքում Հրանտ Ավանեսյանն ասաց, որ հոգեկան խնդիրների առաջացման համար կան ժառանգական, կենսաբանական, հոգեբանական և սոցիալական պատճառներ: Նրա խոսքով՝ առաջին երկուսը բժշկական խնդիրներ են, որոնք առողջապահության համակարգում են լուծում գտնում, իսկ վերջին երկուսը լայն պրոբլեմատիկ իրավիճակներն են, որոնք առկա են հասարակությունում:
«Դեպրեսիվ վիճակը բնորոշ է և՛ աշխատողին, և՛ չաշխատողին: Ֆրանսիայի մեծ ընկերություններից մեկում մեծացել է ինքնասպանությունների թիվը. հետագայում պարզվել է, որ այդտեղի կառավարման համակարգը շատ խիստ է եղել»,- նկատեց Հ. Ավանեսյանը: