Ամերիկյան Տեխաս նահանգի Հյուսթոն քաղաքի դատարանը երեքշաբթի երկրից դուրս չգալու մասին ստորագրությամբ ազատ է արձակել ԱՄՆ-ից ՌԴ միկրոէլեկտրոնիկայի ապօրինի արտահանման գործով անցնող Լյուդմիլա Բագդիկյանին: Ծագումով Ադրբեջանից ԱՄՆ քաղաքացին, որը հանդիսանում է տեխասյան Arch Electronics ֆիրմայի աշխատակցուհի, փաստացի կգտնվի տնային կալանքի տակ: Եթե նա չներկայանա հաջորդ դատական նիստին, ապա նրանից 100 հազար դոլար կգանձվի: Այս մասին հայտնում է ITAR-TASS-ը:
Դատարանը նաև որոշում է կայացրել գրավի դիմաց ազատ արձակել գործով անցկող մեկ այլ ամբաստանյալի` դարձյալ Arch Electronics-ի աշխատակցուհի Սվետլանա Զագոնին: Ուկրաինական ծագմամբ ԱՄՆ քաղաքացին ազատ արձակվելու համար պետք է 25 հազար դոլար գրավ վճարի:
Սվետլանա Զագոնի գործով դատարանը վերանայել է իր որոշումը: Ուրբաթ նրան գրավի դիմաց ազատ էին արձակել, սակայն շուտով առանց պարզաբանման վերադարձել հյուսթոնյան բանտ:
«Ռուս Անաստասիա Դյատլովան, որին մերժել են ազատ արձակել գրավի դիմաց, գտնվում է ճնշված վիճակում,-աղբյուրին հայտնել է նրա փաստաբան Ալեքսեյ Տարասովը,-դատարանը ուշադրություն չի դարձրել պաշտպանության փաստարկներին, որ նա փորձեր չի ձեռնարկի՝ դուրս գալու ԱՄՆ-ի տարածքից»:
Դատախազությունը հաստատում է, որ նրան սպառնում է 20 տարվա ազատազրկում: Չնայած, համաձայն գործող իրավաբանական պրակտիկայի, Ռուսաստանում տարեց մայր ունեցող Դյատլովայի համար առավելագույն պատիժը կարող է լինել 67 ամսվա ազատազրկումը: «Դա ամենաբացառիկ ժամկետն է, որ նա կարող է ստանալ, եթե դատարանը նրան մեղավոր ճանաչի ԱՄՆ-ի արտահանման ռեժիմի խախտման մեջ` ի վնաս ազգային ռազմական շահերի»,- նշել է փաստաբանը:
Այսօր՝ տեղի ժամանակով 17:00-ին, դատարանում տեղի կունենան լսումներ Անաստասիայի փաստաբանի` նրան Հյուսթոնում թողնելու անհրաժեշտության մասին միջնորդության վերաբերյալ:
Արդեն այս շաբաթ նախատեսվում է ամբաստանյալներին տեղափոխել Նյու Յորք: Նրանց դեմ քրեական գործը հարուցել է Բրուկլինի շրջանային դատարանը: Հենց այդ շրջանում է գտնվում Ջոն Քենեդու անվան միջազգային օդանավակայանը, որի միջոցով էլ, համաձայն մեղադրանքի, նրանք իրականացրել են ապօրինի արտահանումները:
Արտահանումն իրականացվել է` ի շահ ռուսական զինվորական և հատուկ ծառայությունների: Ռուս պաշտոնատար անձինք դեպքի առթիվ հայտարարել են, որ մեղադրանքը կրում է բացառապես քրեական բնույթ և չի վերաբերում հետախուզական գործունեությանը:
