Օրեր առաջ Երևանի «Նեմո» դելֆինարիումը վերսկսեց իր աշխատանքները: Այս աշխատանքներին զուգահեռ սկսեցին իրենց մտահոգությունների մասին խոսել նաև բնապահպանները:
Ինչպես «Առաջին լրատվական»-ի հետ զրույցում ասաց բնապահպան Սիլվա Ադամյանը, երբ նախկինում իրենք հայց էին ներկայացրել դատարան, ճանաչվել էին «ոչ պատշաճ հայցվոր». «Մեզ ասացին, որ մենք իրավունք չունենք դելֆինների շահերը պաշտպանելու, որպես հասարակական կազմակերպություն: Եթե անմիջապես մեր շահերին չի սպառնում, չենք կարող դիմել դատարան»։
Բնապահպանը նշեց, որ կանխավ չի ցանկանում ինչ–որ բան ասել, թե ինչ քայլեր կձեռնարկվեն, բայց հստակեցրեց, որ ուզում են շարունակություն տալ այս ամենին, բայց ժամանակը ցույց կտա: «Նոր ենք սկսել մեր իրավաբանի հետ քննարկել, երբ նոր քայլ ձեռնարկենք այդ մասին կտեղեկացնենք հանրությանը: Պետք է շատ լուրջ գործողություններ ծավալվեն»,- ասաց Սիլվա Ադամյանը:
Հիշեցնենք, որ «Նեմո» դելֆինարիումը դադարեցրել էր իր աշխատանքներն այն պատճառաբանությամբ, որ կենդանիները հյուրախաղերի են մեկնում, այնինչ, ըստ բնապահպանների, կենդանիները դելֆինարիումում գործող անհարմար պայմաններից և շահագործումից հիվանդացել են և այլևս չեն կարող ներկայացումների մասնակցել:
«Նեմո» դելֆինարիումը շահագործվում է 2010 թվականից: Այս ընթացքում բնապահպանները չեն դադարում պնդել, որ ծովային կենդանիները չեն կարող խիստ քլորացված ջրում գոյատևել ու մասնակցել ամեն օր մի քանի ներկայացումների:
