Эхо Москвы ռադիոկայանին տված հարցազրույցում ամերիկացի փորձագետ Սեմ Չարապը հայտարարել է, որ Վրաստանի նախագահ Միխեիլ Սաակաշվիլիի «Միացյալ ազգային շարժում» կուսակցությունը իշխանության գլուխ կլինի նաև 2013-ից հետո, երբ ավարտվում է ներկայիս նախագահի պաշտոնավարման ժամկետը: «Ամերիկյան պրոգրեսի համար» կենտրոնի` Ռուսաստանի և Եվրասիայի խնդիրների տնօրեն Չարապի կարծիքով, հաջորդ նախագահը լինելու է Սաակաշվիլիի կուսակիցներից:
Անդրադառնալով ռուս-վրացական հարաբերությունների կարգավորմանը՝ փորձագետը կարծիք է հայտնել, որ մոտ ապագայում երկու երկրների իշխանական բուրգերը անփոփոխ են մնալու, և դա պետք է հաշվի առնվի բանակցային գործընթացում, իսկ կոնկրետ անձերի շուրջ էմոցիոնալ ֆոն է կուտակված:
Միևնույն ժամանակ նա անհրաժեշտ է համարում կողմերի միջև կապերի ակտիվացումն ու ընդլայնումը: Ներկայումս կապերի հարթակներ չկան, հասարակությունների միջև շփում չկա, մինչդեռ ռուսական ու վրացական կողմերի ներկայացուցիչները կարող են ժնևյան բանակցություններից ավելի հաճախակի հանդիպել ու խնդիրներ լուծել:
