Աֆղանստանի նախագահ Համիդ Քարզայը չի ընդունել ԱՄՆ ներողությունները ՆԱՏՕ-ի ուժերի կողմից անցկացված գործողության ընթացքում 9 երեխայի սպանության համար: Երկրի նախագահը հայտարարել է, որ միայն ներողություն և ափսոսանք հայտնելը բավարար չէ։ «Մենք չենք կարող Աֆղանստանի բնակչության շրջանում կորուստներ թույլ տալ»,- ասել է նա: Այս մասին հաղորդում է Associated Press գործակալությունը:
Տեղեկացնենք, որ ողբերգությունը տեղի է ունեցել անցած շաբաթ, երբ հրթիռակոծության ժամանակ ՆԱՏՕ-ի զինվորականները ճիշտ չեն որոշել իրենց ռազմաբազայի ուղղությամբ հրթիռի արձակման վայրը` ռմբակոծելով անտառում հավաքված երեխաներին: Դրա հետևանքով զոհվել էր 8-12 տարեկան 9 երեխա, մեկը վիրավորվել էր: Աֆղանական քաղաքներում տեղի էին ունեցել բողոքի ակցիաներ, որոնց կարգախոսն էր` «Մեզ պետք չեն ամերիկացիները, թալիբները, կառավարությունը, որոնք սպանում են մեր երեխաներին»:
Այսօր անսպասելի այցով Աֆղանստան է ժամանել ԱՄՆ պաշտպանության նախարար Ռոբերտ Գեյթսը: Այս մասին հաղորդում է Reuters գործակալությունը: Նախատեսվում է, որ նա հանդիպում կունենա Համիդ Քարզայի հետ և կփորձի հարթել այն հակասությունները, որոնք ծագել են վերջին օրերի ընթացքում:
