Վրաստանում ռուսական հետախուզության օգտին լրտեսական գործունեության մեջ մեղադրվող մոտ երկու տասնյակ անձանցից առնվազն երկուսը հայեր են, այս մասին տեղեկացնում են վրաստանյան մի շարք աղբյուրներ:
Վրաստանյան InterPressNews գործակալությունը, վկայակոչելով փաստաբան Նանա Ցուլաձեին, հայտնում է. «Իրավապահները հոկտեմբերի 17-ին ձերբակալել են Վրաստանի քաղաքացիներ Արմեն Գեւորգյանին եւ Ռուբեն Շիկոյանին: Ձերբակալվածների հստակ թիվն ինձ հայտնի չէ: Գործի քննությունն ընթանում է լիակատար գաղտնիության պայմաններում: Հայտնի չէ նաեւ, թե երբ են իրավապահները պատրաստվում հետաքննության մասին տեղեկատվություն հրապարակել: Ինչ վերաբերում է իմ պաշտպանյալներին, ապա նրանք ազգությամբ հայ են, Վրաստանի քաղաքացիություն ունեն», – նշել է Ցուլաձեն: Փաստաբանի խոսքով` մինչեւ ձերբակալությունը երկուսն էլ աշխատել են բեռների եւ նավթամթերքի ստուգումներով զբաղվող մի ընկերությունում: «Գեւորգյանն այդ ընկերության տնօրենն էր, Շիկոյանը զբաղեցնում էր նրա տեղակալի պաշտոնը», – ասել է Ցուլաձեն: Վրացական գործակալությունը նաեւ տեղեկացնում է, որ Արմեն Գեւորգյանը Ասլան Աբաշիձեի իշխանության տարիներին Աջարիայի հայ համայնքի ղեկավարն է եղել:
The Georgian Times -ի տեղեկություններով, Շիկոյանին եւ Գեւորգյանին մեղադրում են ՌԴ մի քաղաքացուց գումար ստանալու մեջ: «Ենթադրաբար, այդ ռուսաստանցին հետախուզության աշխատակից է եղել», – նշում է պարբերականը: Վրացական աղբյուրները նաեւ տեղեկացնում են, որ ըստ հետաքննող մարմինների` ձերբակալվածներին հանձնարարված էր տեղեկություններ հավաքել Վրաստանի ներքին գործերի եւ պաշտպանության նախարարությունների կողմից իրականացված գնումների, ինչպես նաեւ ուժային կառույցների աշխատակիցների անձնական տվյալների մասին:
Ինչպես արդեն տեղեկացրել ենք` վրաց իրավապահները խոստացել են գործի մանրամասները հրապարակել նոյեմբերի 5-ին:
Իսկ ռուսաստանյան Коммерсант-ը, անդրադառնալով խնդրին, գրում է. «Ուշագրավ է, որ ռուսական հետքով հերթական լրտեսական սկանդալը ծագել է վրացական ընդդիմության խոստացված ակտիվացման շեմին: Վրացական ընդդիմությունը նոյեմբերի երկրորդ կեսին պատրաստվում է փողոց դուրս գալ` իր անհամաձայնությունը հայտնելով նախագահ Սահակաշվիլիի վարած քաղաքականությանը: Եվ չի բացառվում, որ նոյեմբերի 5-ին իշխանությունները փորձեն ըննդիմության ակտիվացումը կապել Մոսկվայի խարդավանքների հետ: Առավել եւս, որ նման գործելաոճը նախկինում կիրառվել է»:
