Կարինեն 12 տարեկան է։ Հաստատությունում է գտնվում շուրջ 1 տարի։
Կարինեի կենսաբանական մայրը զբաղվում է մարմնավաճառությամբ և երեխայի ծնունդից հետո թողել է նրան ընկերուհու մոտ, որպեսզի կարողանա աշխատել։
Կարինեն որպես մայր ճանաչում է մոր ընկերուհուն։ Սակայն աղջկա 12 տարեկան դառնալուց հետո նրա ոչ կենսաբանական ծնողները ստիպել են, որ աղջիկը զբաղվի մուրացկանությամբ։ Ապա տեսնելով, որ մուրացկանությամբ չի կարողանում շատ գումար վաստակել` աղջկա խորթ հայրը ծեծուջարդի միջոցով նրան մարմնավաճառության է դրդել:
Այս մասին տեղեկացնում է «Ներդաշնակ հասարակություն» սոցիալական աշխատողների հայաստանյան ասոցիացիան։
«Նրանք ինձ ստիպում էին վատ բաներ անել։ Այնտեղ, որտեղ մենք ապրում էինք, մեծ մարդիկ կային, որոնք ինձ դրդում էին մերձեցման և դրա դիմաց ինձ 200 դոլար փող էին տալիս։ Մի մարդ կար, որը ավտո ուներ, գալիս էր ինձ վերցնում էր և տանում մի տեղ և ստիպում, որ այդպիսի վատ բաներ անեմ։ Ես այդ մասին որևէ մեկին չէի պատմում, վախենում էի, որովհետև այդ մարդը սպառնացել էր սպանել ինձ, եթե որևէ մեկին պատմեմ։ Իսկ հիմա պատմում եմ, որովհետև նա հիմա Ռուսաստան է գնացել»,- պատմում է այսօր հաստատություններից մեկում գտնվող Կարինեն, որի անունը հասկանալի պատճառով փոխված է։