«Որքան կորուստ՝ փոքր բանի համար» նախատինքով Լոս Անջելեսի Գերագույն դատարանի դատավորը երկու հայ տղամարդու դատապարտել է տևական ժամկետով ազատազրկման` 3 տարի առաջ վիրավորական հաղորդագրության պատճառով դեռահասի սպանության մեղադրանքով: Այս մասին հայտնում է Glendale News Press-ը:
Զարեհ Մանջիկյանը դատապարտվել է 50, իսկ Վահագն Ջուրյանը`25 տարվա ազատազրկման`19-ամյա Գոմբերտ «Մայք» Եփրեմյանի սպանության համար:
«Երիտասարդի կյանքն ավարտվեց տեքստային հաղորդագրությունում մի չմտածված բառի պատճառով,- ասել է դատավոր Գրեգորի Ա. Դոհին,- սա անմտության մարմնավորում է, և ինձ շատ է ապշեցնում»:
Եփրեմյանը հայտնվել է թիրախում 2009-ի նոյեմբերին` իր ընկերուհուն տեքստային հաղորդագրություն ուղարկելուց հետո, որում նա աղջկա ընկերներից մեկին անվանել էր «քած»: Այդ ընկերը`Խաթուն Վարդանյանը, տեսել է հաղորդագրությունը, զայրացել և կանչել իր եղբորը, որպեսզի վերջինս ծեծի Եփրեմյանին:
Ականատեսները վկայում են, որ Եփրեմյանը անծանոթից հեռախոսազանգ է ստացել: Զանգահարողը պահանջել է հանդիպել Հյուսիսային Հոլիվուդի Sears ավտոկայանատեղիում: Նախանշված վայրում Եփրեմյանն ու նրա մի քանի ընկերները հանդիպել են վերը նշված երկուսին: Կարճատև զրույցից հետո տղամարդկանցից մեկը հարվածել է Եփրեմյանին, իսկ երկրորդը դուրս է բերել զենքն ու գլխի հետևի կողմից կրակել նրա վրա: Կրակողը Մանջիկյանն է եղել: Ո՛չ Մանջիկյանը և ո՛չ էլ Ջուրյանը մինչև 2011 թվականը ձերբակալված չեն եղել: Նրանք երկուսն էլ 25 տարեկան են:
Los Angeles Times-ի փոխանցմամբ` օգոստոսին դատարանը Մանջիկյանին և Ջուրյանին մեղավոր է ճանաչել առաջին աստիճանի սպանության և հարձակում իրականացնելու նպատակով դավադրության մեջ:
23-ամյա Վարդանյանն ու նրա եղբայրը`20-ամյա Հովիկ Ջուրյանը, մեղադրվել են հարձակում իրականացնելու դավադրության մեջ: Ուրբաթ նրանցից յուրաքանչյուրը դատապարտվել է 5 տարվա պայմանական ազատազրկման և 1000 ժամ հասարակական աշխատանքի:
Մինչ դատավճռի ընթերցումը, Վարդանյանը հանդես է եկել խոսքով. «Ես սառնասիրտ չեմ: Ես սոցիապատ չեմ: Ես գիտեմ՝ հարցը վերաբերում էր իմ ազնվությունը: Ես ոչինչ չեմ դավադրել»:
Վեն Նայսի դատարանում մինչ դատավճռի ընթերցումը Եփրեմյանի ծնողները հուզական ելույթ են ունեցել, հիշել իրենց որդուն՝ որպես մեծահոգի երիտասարդի և խոսել ամբաստանյալների հետ:
«Կցանկանայի՝ ձեզ երբեք չհանդիպեի»,- ասել է Անի Աթաջյանը` Եփրեմյանի մայրը` արցունքներն աչքերին: Նա կարծում է, որ որդուն անհանգստացրել է Խաթունի ազդեցությունն իր ընկերուհու վրա:
Ջուրյանի քույրերը` Աննան և Ռուզաննան, լսելով եղբոր դատավճիռը, արտասվել են: Ռուզաննա Ջուրյանը իր գրած պոեմում եղբորը նկարագրել է որպես «սիրող և հոգատար, կյանքով ու էներգիայով լեցուն մարդու, որի աշխարհը հանկարծակի կործանվեց»:
Իշխանությունները հավատացած էին, որ Ջուրյանը փախել է Հայաստան, սակայն 2011-ին նրան ձերբակալել են Վեն Նայսի տունը վերահսկողության տակ առնելու արդյունքում: Մանջիկյանին առաջինը նկատել էին Պուերտո Ռիկոյում, սակայն երաշխիքների դիմաց ազատ էին արձակել: Նա անհետացել էր, եղբոր փաստաթղթերով թռել կղզու տարածքից` սկզբում Ֆիլադելֆիա, ապա Լաս Վեգաս, այնուհետև` Վեն Նայս: